2018年2月28日 星期三

栗子冬菇炆雞


今日煮咗煲栗子冬菇炆雞,

老公和小魔怪都讚話好食,

原因係佢哋除鐘意食栗子之外,

更鐘意個雞煲裡D雞夠哂大件,

食落就唔會流失雞嘅味道喎!

哈哈,

講到好似成個食評家咁樣呀!

2018年2月27日 星期二

藕片炒肉碎


今次呢碟餸係廚餘煮成架!

蓮藕片係上次炆豬手時用剩的,

加埋少少肉碎咁就炒埋一碟餸;

嘻嘻!

打斧頭餸又出爐啦!


2018年2月26日 星期一

上水竹島水產西日放題


一年一度嘅一期一會又嚟啦!

今日我就約埋3位travel buddy食放題,

傾下嚟緊星期日我哋又約埋一齊飛啦!

目的地係日本福岡,

超級期待今次旅程呀!

講番呢個放題,

我哋食早場5:00~7:00,

以為冇咩人咁早食晚餐,

點知成場full哂,

下次都係打電話book定穩陣D呀!



2018年2月24日 星期六

南乳蓮藕花生支竹炆豬手


今日屋企冇wifi用,

攪到頭都大哂,

拿拿臨即刻買個router返嚟,

攪咗我成個幾兩個鐘先可以用wifi上網,

俾電訊商玩C我啦!

講返今日整呢個南乳蓮藕花生炆豬手,

原來我兩年前今日都係整呢個餸,

妳哋話橋唔橋呢???

2018年2月23日 星期五

2018年2月22日 星期四

人日快樂


今日年初七,

祝大家人日快樂呀!

生日緊係要食雞啦!

呢隻雞係惠州帶返嚟,

自家養大肥雞,

肉地比較實,

骨頭更加硬,

最好就係拆絲點豉油食喇!

客家人好鐘意用乾蔥頭、豉油加熟油嚟點雞食的,

而我就鐘意食薑蔥,

所以做咗呢個混合版,

正到爆呀!

 

2018年2月21日 星期三

印度椰子合掌瓜粟米甘筍豬腱湯


話咁快今日又到咗年初六,

又係時候回歸平淡了;

農曆新年期間,

餐餐都大魚大肉,

所以今日就煲咗呢個印度椰子合掌瓜粟米甘筍豬腱湯,

啖啖椰子香味,

清甜好飲,

仲好潤添架!


2018年2月20日 星期二

新春回鄉


每年初三,

我哋都會返惠州過年,

返到惠州屋企,

堂弟婦已經幫我哋攪好衛生,

仲買咗好多生果擺係屋企添,

呢個弟婦真係抵錫呀!


2018年2月18日 星期日

大年初三


今日大年初三~赤口,

每年我哋都會返惠州過年,

今年亦唔例下,

大伯、大伯娘、姑奶、老公、小魔怪和我,

由於大魔怪初五攞唔到假,

所以留係屋企呀!

講返噚晚,

我哋提早同祈祈慶祝生日,

佢今年7歲啦!
晚餐則由姐姐親手包辦,

姐夫一D都冇幫手(嘻嘻,佢陪我哋打麻雀呀!)

都好好餸喎!


2018年2月17日 星期六

大年初二


今日大年初二,

簡簡單單食過開年飯,

手撕雞、荷豆炒素粟米餅、南乳炆齋,

又要趕住出外拜年啦!


2018年2月16日 星期五

大年初一


今日大年初一,

我祝大家身體健康,

龍馬精神,

心想事成,

萬事如意!

今日負責煮11人素食晚餐,

6餸1湯,

白飯任裝!



2018年2月15日 星期四

脆皮燒腩仔

話時話,

我都好耐冇整過燒肉,

記得上次整係2014年尾囉!

今日襯係年三十晚,

整番舊靚靚燒腩仔嚟食下都好喎!

由於好耐冇整而且又用新爐,

唔知會唔會成功呢???

好彩睇落都似模似樣呀!


2018年2月13日 星期二

2018朱家蘿蔔糕


今日好勤力,

一早起身買哂所有材料,

開始整朱家蘿蔔糕呀!

今年刨咗5斤半蘿蔔,

其中有部份蘿蔔用刀切絲;

總共整咗2個9寸和2小個蛋糕盆嘅蘿蔔糕,

一次過放哂入蒸焗爐度蒸,

慳水又慳時候,

正呀!



2018年2月12日 星期一

炸腰果


又係時候開始準備過年食品啦!

今次第一樣就係整呢個炸腰果啦喇!

大小魔怪鐘意食油炸腰果,

雖然知道係好健康,

但一年都整唔到一兩次,

放縱一次咁多啦!


2018年2月11日 星期日

25週年


今日係我和朱生結婚25週年,

有咩慶祝活動???

哈哈,

就係留係屋企大掃除喇!

廚房、廁所、汽車都抹得乾乾淨淨,

仲出街買咗好多過年食品添;

又去花場攞埋盆蘭花返屋企,

成間屋煥然一新!

晚餐就簡單出去食番餐咋!


2018年2月10日 星期六

與家人提早團年


原本上星期六同母親大人姐姐妹妹佢哋一齊團年,

點知酒樓擺烏龍上星期要擺婚宴,

所以推遲到今日先嚟團年呀!

唔使講又係呢間~石門彩福皇宴啦!



2018年2月9日 星期五

生炒臘味糯米飯


噚日俾人挑起我條為食筋,

好想食生炒臘味糯米飯,

今日拿拿臨摷哂所有材料出嚟,

整番碟嚟嘆下先得!

2018年2月8日 星期四

兩個人的晚餐


兩個人的晚餐,

一碟鮑魚燴生菜,

一鍋紫菜蕃茄雞蛋肉絲湯,

簡簡單單又一餐!


2018年2月7日 星期三

黑椒洋蔥燴豬扒


臨近過年,

又係清清雪櫃嘅物資嘅時候啦!

摷下個雪櫃,

睇下有咩樽裝醬料可以用嚟煮餸先得!

今次就用咗黑椒醬煮咗呢個黑椒洋蔥燴豬扒,

認真快靚正,

仲好鬼惹味添架!

2018年2月5日 星期一

柱候蘿蔔支竹炆排骨


正所謂:冬食蘿蔔夏食薑,

呢排D蘿蔔真係好鬼靚,

咁吸引,

點可以唔買番個返嚟食呢?


2018年2月3日 星期六

2018朱家團年飯


自從2年前小魔怪去英國讀書後,

今年終於可以一齊團年啦!

但因為下星期小魔怪會去馬來西亞探女朋友仔,

所以朱家今日提早團年,

母親大人和妹妹一家都有嚟架!



2018年2月2日 星期五

時款日式麵包製作精選實習高班~第四堂


黑糖南瓜籽提子包&椰子奶酥麵包,

雖然呢堂整嘅麵包冇餡料,

睇落好似齋齋哋咁,

但其實個椰子奶酥麵包勁肉菠蘿包,

仲帶有椰絲香味,

老公和大小魔怪都爭住食添呀!


2018年2月1日 星期四

素飯盒(4)


又嚟素飯盒啦!

整咗咁多款素飯盒,

其實內容都係大同小二,

不過每次配搭都變少少,

咁咪又係新菜式囉!