2016年6月30日 星期四

紅豆薏米水


今日唔煲湯,

但煲紅豆薏米水。

紅豆薏米水有袪濕健脾,

利尿去水腫等功效,

但生薏米較寒涼,

懷孕及月事期間嘅朋友,

都不宜飲用!



2016年6月29日 星期三

法式麵包製作精選實習班~第六堂


好耐冇post麵包班嘅作品喇!

呢堂整咗金寶藍莓芝心包、佛雅斯包,

兩款包都好好味道架!


2016年6月28日 星期二

豉汁鳳爪排骨


其實小魔怪和老公口味都幾相似,

問佢仲想食咩,

佢竟然話要食鳳爪,

老公即刻舉腳贊成,

咁即係唔整唔得啦!


2016年6月27日 星期一

羅漢果水



呢輪天氣熱得好犀利,

一冷一熱好易病架!

老公和小魔怪都中咗招,

咳兼發燒,

吃藥少不免;

今朝煲定羅漢果水,

等佢哋潤下喉嚨啦!


2016年6月26日 星期日

家庭聚會


噚日輪到老公請母親大人姐姐妹妹家人食飯,

我除咗整咖哩豬皮蘿蔔魚蛋,

大魔怪返暑期工出咗糧,

請大家食雪條添呀!

晚餐又係去天盛富臨皇宮,

今次冇叫套餐,

自選餸菜都唔錯架!


2016年6月25日 星期六

咖哩豬皮蘿蔔魚蛋


今日又有家庭聚會,

整咗呢個咖哩豬皮蘿蔔魚蛋做小食,

每次煮好後小魔怪和我都偷食唔少,

哈哈,

真係食極都唔厭架!



2016年6月24日 星期五

慶祝~天盛富臨皇宮


最近老公升職,

值得高興;

做咗咁多年,

相識滿天下,

請同事食飯係指定動作,

呢類飯局都差不多有5~6次咁多呀!

老公又點會少得我哋呢,

昨晚老公就請大伯和姑奶等食飯!

老公講咗咩人情都唔使做,

但姑奶新抱淇淇買咗件衫做禮物,

而大伯又封咗利事俾老公呀!


2016年6月23日 星期四

雪梨乾山楂水


今日煲咗雪梨乾山楂水,

酸酸甜甜,

冷飲熱飲都得架!

怕酸就加冰糖,

我唔怕,

咁先原汁原味呀!



2016年6月22日 星期三

雙冬瑤柱肉粒咸蛋湯飯


天氣熱辣辣,

入廚房煮完餐餸,

真係會哂胃口架!

所以今餐滾咗個雙冬瑤柱肉粒咸蛋湯,

加埋半碗飯,

呢個湯飯濕濕哋,

有瓜有肉又有湯,

我鐘意呀!


2016年6月21日 星期二

鹽焗火雞腎


小魔怪真係要求多多,

今次又話想食鹽焗雞腎喎!

呢個簡單啦!

即刻排頭位整俾佢食啦!

今次用咗火雞腎較爽口,

唔啤啤佢又點得呢!

飲勝!




2016年6月20日 星期一

愉快的父親節


昨日係父親節,

我哋約埋姑奶和外甥女,

一齊去雲泉仙館探奶奶;

大小魔怪第一次去,

覺得呢度環境都唔錯呀!


2016年6月18日 星期六

印尼沙爹串燒雞


前幾日見到Samwei整沙爹串燒雞,

我又唔抵得今日又整番餐自己嘆下啦喂!

兩個人食整咗8串每人食4串,

咁就唔使爭食啦!


2016年6月17日 星期五

鮑汁花生雞腳


雞腳,

都係小魔怪指定想食嘅嘢嚟架!

今日就整咗鮑汁花生雞腳俾佢嘆,

再加罐冰凍啤酒,

爽呀!


2016年6月16日 星期四

易滿足~板長壽司


小魔怪返嚟第一餐,

佢話一定要去食日本嘢,

因為係英國咁耐,

一餐都冇食過呀!

我哋去咗天水圍新北江商場嘅板長壽司,

唔使講佢一定order食壽司啦!

我哋係會員免收加一,

呢餐食咗$308。

唔係喇,

小魔怪咁大食,

下次都係同佢去食日式放題好過囉!



2016年6月15日 星期三

幾可亂真~欖菜乾扁素四季豆


今個星期大魔怪開始返暑期工,

日日都早出晚歸,

唔想俾佢有任何壓力,

唯有煮多D好嘢俾佢食啦!


2016年6月14日 星期二

法式麵包製作精選實習班~第五堂



香草啤酒包、小玉米包、芝麻芥末包,

呢堂又係整健康包,

不過我超唔健康,

將個啤酒包切片烘完搽牛油食,

哈哈,

好味道啊!




2016年6月13日 星期一

菜乾甘筍咸鴨腎豬腱湯


今晚小魔怪會由英國返嚟香港逗留一個月,

佢話好耐冇飲過老火湯喎!

得得得,

煲湯我至拿手,

今日就煲咗菜乾甘筍咸鴨腎豬腱湯,

呢個湯有清熱潤肺等功效架!


2016年6月12日 星期日

節瓜冬菇炆排骨


近期瓜瓜菜菜價格比新年時已經平番好多,

記得上星期街市買節瓜$5有5小個,

今次就$5有3大個,

真係平到唔買唔得囉!

呢餐用咗2個嚟炆排骨,

剩番果個節瓜整咩好呢???


2016年6月11日 星期六

鬼馬肉碎雞蛋


肉碎蒸雞蛋就食得多,

今次攪攪新意思,

加咗我至愛嘅油炸鬼落去,

用先蒸後焗嘅方法,

焗完出嚟嘅油炸鬼脆卜卜,

加埋軟綿綿嘅肉碎雞蛋,

食落又脆又軟,

哈,

有雙重口感,

好矛盾啊!


2016年6月10日 星期五

又嚟~紅磡都會海逸酒店自助午餐


半年冇嚟呢度食自助午餐,

一樣咁多人,

貪呢度下午自助餐都有即開生蠔食,

價錢冇變都係正價$308,

不過用中銀信用咭就有8折,

即係約每人$277左右呀!

今次我嘅戰鬥力好似好弱,

比平時食少咗添,

哈,

唔抵呀!


2016年6月8日 星期三

2016愛心糭


今日又到包糭嘅大日子啦!

本來今年都諗住包十零隻應下節就算,

點知小魔怪話想食多豆嘅糭喎!

(佢下星期會由英國返嚟一個月呀!)

所以拿拿臨買齊材料,

今日開工呀!

今年總共包咗57隻糭,

8隻素豆糭俾大魔怪,

9隻冇蛋黃有肉糭俾小魔怪,

40隻有蛋有肉糭!



2016年6月6日 星期一

返鄉下


一連3日返咗惠州,

以為可以避開香港呢幾日嘅黃雨啦!

點知星期六中午返到惠州,

已經開始落大雨,

仲越落越大添呀!

求求其其搵間小店食午餐,

呢度真係經濟實惠,

4個餸+蘿蔔湯+飯,

都係56蚊人仔,

湯和飯係任添食架!

(不過店名唔記得影)



2016年6月4日 星期六

椰菜炒粉絲


大魔怪好鐘意食粉絲,

無論係放湯、乾炒或煮齋菜都好,

次次都話唔夠佢食;

今次專登炒咗一大碟粉絲,

應該夠佢食啦掛???

2016年6月3日 星期五

素雜菜湯


大魔怪由宿舍返咗嚟屋企都成個星期,

今日就煲番個素雜菜湯俾佢飲啦!

其實呢個素雜菜湯我都成日煲架!

蕃茄、薯仔、甘筍和椰菜係必落嘅,

有時我仲會加埋南瓜、西芹和洋蔥添,

所以話煲雜菜湯,

真係妳想點煲都得架!

不過點煲都好,

都要加片薑落去一齊煲,

感覺冇咁寒涼呀!


2016年6月2日 星期四

香草黑椒焗雞扒配牛油粟米粒


呢幾日真係超級熱,

日日都起碼成32~33度,

如果屋企唔開冷氣真係好似焗爐咁架!

咁熱,

我又唔想煮飯,

懶得就懶嘛,

不過懶都要食嘅,

開個焗爐焗件雞扒,

炒個牛油粟米粒代替飯,

焗到塊雞皮鬼脆,

大家啱唔啱食呀???




2016年6月1日 星期三

今日餃餃日


今日係餃餃日,

我成朝係廚房切切切,

包包包,

總共包咗23隻白菜木耳豬肉餃,

46隻椰菜木耳香菇餃(素),

咁就可以一次滿足哂2個人嘅願望啦!