2016年5月31日 星期二

2016年5月30日 星期一

蒜香梅菜蒸茄子


簡簡單單一碟蒸茄子,

加咗惠州買返嚟嘅甜梅菜,

真係超級惹味!

想食得招積,

用白鑊(即係唔落油)先炒到梅菜乾身,

加糖和麻油炒香後舖係茄子面,

蒸熟之後,

咁碟蒜香梅菜茄子就完成啦!


2016年5月29日 星期日

少甜版~琥珀合桃


老公買咗1磅合桃返嚟,

為咗要消滅佢,

今日我用咗一半嚟整琥珀合桃,

甜度自己調較,

整咗一大盆嚟做小食,

哈哈,

老公話: 唔太甜,又幾唔錯喎!

希望我搵到樽裝之前,

唔好俾老公和大魔怪食哂啦!


2016年5月28日 星期六

白汁蘑菇芝士焗薯仔


噚日大魔怪由宿舍搬返屋企,

唔覺唔覺佢住係宿舍差不多有9個月啦!

放暑假期間,

佢搵到份銀行暑期工,

雖然係打雜一名,

但都好吖,

唔使日日係屋企打機嘛!

大魔怪返咗嚟,

我又要多煮素食餐喇!

諗住焗緊嘢唔使理,

走咗去烚菜,

點知轉頭睇下D芝士已經燶燶哋,

所以話一心真係唔可以二用架啦!




2016年5月27日 星期五

節瓜鱆魚花生眉豆豬腱湯


經過噚日一整日嘅休息和勁飲暖水後,

今日我把聲雖然都仲係沙沙哋,

不過比噚日已經好好多喇!

今日好想好想飲湯,

拿拿臨買齊材料煲啖湯水飲下先得,

節瓜鱆魚花生眉豆豬腱湯,

係我至愛湯水之一呀!


2016年5月26日 星期四

蕃茄雞蛋燴肉碎


今朝起身,

冇端端失咗把聲,

我又唔覺自己有咩唔舒服喎!

唔通我又作病!

今餐要加強維他命C,

希望有幫助啦!


2016年5月25日 星期三

瑤柱蝦乾燴節瓜


五蚊咁大粒嘅瑤柱我就冇喇!

不過瑤柱碎呢,

都有唔少架!

我最多都係用嚟煲湯,

都唔需要好大粒嘅瑤柱啦!

(自我安慰中!)


2016年5月24日 星期二

法式麵包製作精選實習班~第三堂


法包&煙肉包&蒜蓉吐司;

唔係講笑,

呢個法包和煙肉包真係好好食,

尤其用法包嚟整蒜蓉包,

簡直係極品呀!

我將個法包放咗入雪櫃,

等大魔怪過兩日先返嚟食,

搽咗亞sir俾嘅香草蒜蓉牛油放入焗爐焗一焗,

焗出嚟蒜蓉包香噴噴,

仲脆卜卜添架!



2016年5月23日 星期一

涼瓜洋蔥炒肉片


唔知幾時開始,

我鐘意咗食涼瓜,

以前覺得佢好苦,

依家就發覺甘甘哋都幾好食吖!

唔通口味嘅嘢,

係會隨著年紀漸長而有所改變???



2016年5月22日 星期日

椰香喳咋糖水


噚日襯屋企人入咗嚟天水圍,

所以煲定個糖水俾大家做茶點,

簡簡單單煲咗個椰香喳咋糖水,

熱食又得,

凍食都得,

任君選擇呀!

天時暑熱,

我就鐘意食冰凍糖水喇!


2016年5月21日 星期六

天盛~富臨皇宮


上星期日跟咗教會旅行和母親大人生日宴,

妹妹佢哋話冇時間打牌,

所以約埋一齊入嚟天水圍,

打番夠本呀!

夜晚就去咗天盛富臨皇宮食晚飯,

好彩一早Book定位,

門口等位嘅人都唔少呀!

今期木桶豉油雞特價$18隻,

我哋叫咗2隻,

食咗成枱都係餸,

姐姐佢哋叫1打壽桃包,

個個拳頭咁大個,

呢餐加加埋埋都係$1130,

都幾抵食架!



2016年5月20日 星期五

沙爹洋蔥雞翼


唔講大家都唔知,

其實我好怕食生洋蔥,

所以我煮洋蔥時,

通常都會煮耐少少,

咁食落洋蔥就會更加甜喇!

今日煮呢個沙爹洋蔥雞翼,

我覺得洋蔥先係主角呀!

2016年5月19日 星期四

黑椒牛柳粒炒意粉


今晚唔食飯改食雜糧呀!

黑椒牛柳粒炒意粉,

半鍋意粉俾我哋兩公婆食哂,

都唔算好大食吖!


2016年5月18日 星期三

XO醬海鮮炒粉絲


終於落實7月中屋企進行大裝修,

裝修會分兩期,

先廁所、廚房和主人房(我哋會繼續住係客房),

整好後,

我哋會將雜物放入主人房,

再裝修其餘2個房和客廳,

聽起嚟好似好複雜,

我諗起都頭痛呀!

呢個係老公決定(佢唔想搬來搬去),

所以冇得改變囉!

講番正題,

用咗XO醬炒粉絲,

真係特別惹味架!


2016年5月17日 星期二

麵豉蒸排骨


今晚我要返學搓麵包,

老公又唔鐘意出街食飯,

所以蒸咗呢碟排骨俾老公做晚餐,

等佢放工返嚟煮翻熱就有得食喇!


2016年5月16日 星期一

蟲草花雲耳冬菇蒸肉片


噚日又玩又食,

今日又要回歸平淡囉!

簡簡單單蒸碟蟲草花雲耳冬菇蒸肉片,

呢個配搭真係冇得輸,

超正呀!

2016年5月15日 星期日

教會旅行&母親大人生日宴


今日我哋一行8人(連同母親大人嘅朋友仔),

齊齊跟妹妹教會去旅行,

上午去參觀大埔嘉道理農場;

初初天氣都唔錯架,

行咗差不多一個鐘左右,

落起大雨,

好彩搵到地方俾母親大人佢哋坐底休息,

園裡有素食亭,

買咗兩份素食飛碟俾兩位老人家食呀!



2016年5月14日 星期六

法式麵包製作精選實習班~第二堂


三色椒芝士包&迷迭香香腸包,

呢兩款包簡簡單單,

芝士包啱哂大魔怪食,

而腸仔包呢就啱哂我喇!




2016年5月13日 星期五

無花果雪耳蘋果南北杏豬腱湯


今日靚湯水~無花果雪耳蘋果南北杏豬腱湯;

屋企有哂材料,

剩係買舊豬腱返嚟就可以煲湯喇!

蘋果生津潤肺;

雪耳滋陰、潤肺、生津、益氣、補腦、強心;

無花果抗癌、降血糖血脂、通便潤腸;

南北杏止咳平喘、潤腸通便。


2016年5月12日 星期四

一個人的晚餐~蕃茄雞蛋拌麵


一個人的晚餐~蕃茄雞蛋拌麵;

原本呢個蕃茄雞蛋拌麵係我嘅晚餐,

點知大魔怪失驚無神返咗屋企,

所以拿拿臨煮多個麵加多隻蛋,

就係咁,

今晚可以同大魔怪撐枱腳喇!

 

2016年5月11日 星期三

陳皮骨


酥炸陳皮骨食得多,

今次整咗個炆嘅版本,

用上母親大人俾我嘅19年陳皮(最後兩片仔),

香味濃郁而不覺肥膩,

真係好好品嚐先得囉!



2016年5月10日 星期二

燕麥榨菜蒸肉餅


榨菜蒸肉餅,

一碟簡簡單單又好味道嘅家常小菜,

加咗燕麥一齊蒸,

肉餅一D都唔鞋口,

仲好滑添呀!

2016年5月9日 星期一

雙丸芥菜煲


係惠州買咗斤新鮮又嫩嘅芥菜返嚟,

緊係要即刻整嚟食啦!

清清哋滾咗個雙丸芥菜煲,

快靚正呀!


2016年5月8日 星期日

母親節,惠州行


噚日我同老公和姑奶3個人,

齊齊返惠州;

近日惠州連場大雨,

我哋成個月冇返去喇,

都唔知間屋會變成點呀!

未返屋企,

緊係要去醫肚先啦!

簡簡單單,

3砵個豬肉湯4砵白飯,

4個餸加送一碟麥包,

都係食咗142人民幣咋!




2016年5月7日 星期六

法式麵包製作精選實習班~第一堂


學咗兩期蛋糕班,

終於輪到學整麵包啦!

今次學整嘅係法式麵包,

亞sir話呢期D包好多餡,

嘻嘻,

肯定啱哂我口味啦!

第一堂學整鮮奶方包、牛油哈司和牛奶卷,

亞sir加咗D芝士粒落方包度,

仲應我哋要求加咗芝士舖面添呀!


2016年5月6日 星期五

芝士鮮茄豬扒焗飯


又係時候清雪櫃嘅冷飯喇!

今日用冷飯整咗呢個芝士鮮茄豬扒焗飯,

加埋幾塊靚靚梅頭豬扒,

冇骨又夠哂腍身,

超正啊!



2016年5月5日 星期四

黑椒洋蔥蘑菇炒三色椒


自入大學開始,

大魔怪決定食素菜而唔再食肉後,

轉眼已經有3年了;

雖然唔再食肉,

但佢都有個好特別嘅習慣,

就係鐘意食有汁嘅素菜,

佢話濕濕哋好送飯喎!


2016年5月4日 星期三

元朗~新駿皇


上星期二開始,

我又要返學啦!

呢期唔係學整蛋糕,

而係學做亞茂~搓麵包呀!

近期我都會約埋同學仔嚟呢度食晚餐,

食完就去返學;

噚晚食呢個枸杞豬膶瘦肉湯配蒜香撈麵(連凍飲$42),

真係好耐(一年都唔到食一次)都冇食過豬膶喇!

豬膶瘦肉都好滑,

一D都唔"鞋"口,

唔錯啊!

同學仔碗鮮茄魚腩片湯河(連凍飲$45),

夠哂大碗呀!


2016年5月3日 星期二

豉椒雞翼


豉椒炒雞翼,

一碟惹味嘅餸菜;

老公冇咩要求,

只係要求要多汁,

用豉汁嚟撈飯,

睇嚟又要添飯囉!


2016年5月2日 星期一

2016年5月1日 星期日

五一勞動節


今日係五一勞動節,

老公朝早9點就約咗舊同學打乒乓波和打桌球,

11點左右約埋我就去食午飯,

跟住就老公同學一齊沿住天水圍旁邊,

一路行去元朗工業村即山貝河旁;

其實我哋大家都唔係咁識路,

靠google map幫忙搵路,

沿途經過嘉湖山莊美湖居對出嘅公園~龍園!