2016年12月31日 星期六

除夕夜晚餐

2016最後一日,

我哋選擇一家人齊齊迎接2017;

由於小魔怪仲係英國,

而大魔怪就約咗朋友仔去玩,

好彩仲有祈祈BB和姨甥仔陪我哋呢幾個老人家一齊過年!


2016年12月30日 星期五

2016中國雲南、昆明、大理、麗江、玉龍雪山~第三天


12月24日星期六

今日雲南大理天色麻麻哋,

我哋第一站就係去洱海觀景台,

因為落緊微微雨,

所以影完相就去祟聖寺三塔!


2016年12月28日 星期三

2016年12月27日 星期二

2016中國雲南、昆明、大理、麗江、玉龍雪山~手信篇


其實跟團去旅行真係冇咩機會買到嘢,

好多時都係經過見到鐘意就要買;

不過今次雲南之旅就冇呢個問題喇,

因為當地景點所賣嘅嘢都係差不多,

只係價錢有差別咋!

2016年12月21日 星期三

2016聖誕之旅~中國雲南、昆明、大理、麗江、玉龍雪山


今年聖誕之旅,

我會同母親大人、姐姐姐夫和妹妹一家3口共7個人,

跟團去玩!

目的地係~中國雲南、昆明、麗江、玉龍雪山、大理6天遊;

去到玉龍雪山咁凍嘅地方,

帶嘅嘢就自然會多少少,

得番半個喼,

應該冇咩嘢會買到掛???

2016年12月20日 星期二

蜜椒香草烤雞


嚟緊星期四我會同家人去旅行,

所以整咗呢個蜜椒香草烤雞配翠肉瓜甘筍,

預早同老公慶祝聖誕節呀!




2016年12月19日 星期一

麵包製作精選實習(特別班)~第六堂


今堂學整日本黑糖紅豆蕃薯包&朱古力蛋糕豆沙方形方包,

兩款麵包我都鐘意食,

而老公就鐘意食朱古力蛋糕豆沙方形方包,

佢仲要求帶返公司食添,

好欣賞咁喎!



2016年12月18日 星期日

素湯~蓮藕馬蹄甘筍眉豆花生湯


噚晚煲咗呢個素湯~蓮藕馬蹄甘筍眉豆花生湯,

唔使講落咗咁多料,

個湯肯定好甜!

最重要係所有煲湯料都可以當餸食,

一D都唔嘥呀!


2016年12月17日 星期六

提早的冬至晚餐



大魔怪呢排考緊試,

所以襯佢今日返到嚟食飯,

簡簡單單做咗四餸一湯,

冬至晚餐,

開飯囉!



2016年12月16日 星期五

菜乾蠔豉豬腱粥


今日煲咗菜乾蠔豉豬腱粥做晚餐

因為老公下午要去洗牙,

洗完牙肯定會牙軟軟,

所以食粥就最啱喇!

配埋魚肉燒賣,

咁又一餐!


2016年12月15日 星期四

2016年12月13日 星期二

手剁~冬菇土魷蒸肉餅



平時懶,

我都好少會自己剁豬肉,

但今日呢個冬菇土魷蒸肉餅就唔同喇,

因為係我親手剁嘅,

真係要好好品嚐先得啦!


2016年12月12日 星期一

麵包製作精選實習(特別班)~第五堂


杏仁糖糕果子麵包&麵條&羅勒松子香草醬,

亞sir話呢個包好適合聖誕節食,

不過我對提子包冇咩興趣,

都係留番俾老公和大魔怪食囉!



2016年12月11日 星期日

雪梨山楂甜菊葉水


每次去雲泉仙館,

我都會去附近攤檔買嘢,

攤檔亞姐好鬼好人,

幫我配咗大大包雪梨山楂甜菊葉用嚟煲水飲,

冷飲熱飲都得,

清甜又解渴,

大魔怪好鐘意飲架!


2016年12月10日 星期六

粉嶺雲泉仙館


今日,

我哋又去咗粉嶺雲泉仙館拜祭奶奶;

每次嚟到呢度周圍擺嘅花都唔同,

今次就擺咗菊花喇,

好靚架!

可惜電話冇叉電,

影得好少相!


2016年12月9日 星期五

節瓜粉絲蝦乾


節瓜粉絲蝦米,

係一個家常餸菜,

今次用咗蝦乾代替蝦米,

即刻升呢,

成碟餸都高貴咗呀!


2016年12月8日 星期四

蓮藕鱆魚馬蹄綠豆煲豬腱


前日買咗個有泥嘅蓮藕用嚟煲湯,

睇落去好污漕,

但呢個蓮藕好粉兼有蓮藕絲,

用嚟煲湯就最啱啦!




2016年12月7日 星期三

麵包製作精選實習(特別班)~第四堂


朱古力/咖啡/大理石麵包&法式層酥麵包;

每次整酥皮麵包都好忙,

又要搓又要雪,

又用好多時間和心機去做,

不過做出嚟呢,

特別好味道,

值得的。


2016年12月6日 星期二

one pot pasta~蕃茄吞拿魚腸仔燴意粉


利用屋企已有嘅食物材料,

整咗懶人至愛one pot pasta~蕃茄吞拿魚腸仔燴意粉,

簡單易做又好味道架!


2016年12月5日 星期一

吉列魚柳


好耐冇開過爐炸嘢,

今日就炸魚柳食下先,

炸到金金黃黃兼外脆內軟,

點埋沙律醬一齊食,

好滿足啊!


2016年12月4日 星期日

本地遊~鶴咀海岸保護區


今日約咗老公舊同學一齊行山,

地點係鶴咀海岸保護區;

10點到達筲箕灣地鐵站A2出口,

旁邊巴士總站等齊人,

食埋個豐富早餐就出發啦!

搭9號巴士去鶴咀!

提提大家,

未必架架巴士都經鶴咀,

一定要睇清楚先好上車呀!

車程大約20分鐘就到架啦!



2016年12月2日 星期五

照燒洋蔥雞扒


今餐整照燒洋蔥雞扒,

一個簡單易整又好味道嘅餸,

加埋我至愛嘅洋蔥,

話時話,

半個洋蔥真係唔夠我食,

下次都係落哂成個落去煮先得囉!


2016年12月1日 星期四

薑汁蒜蓉臘味炒芥蘭


今日炒咗碟老公至愛嘅~薑汁蒜蓉臘味炒芥蘭,

雖然係佢至愛,

但間中食下好喇,

少食多滋味呀!


2016年11月30日 星期三

西洋菜甘筍咸鴨腎豬腱湯


凍凍哋嘅天氣,

有碗熱湯飲下都唔錯架!

今次煲咗我至愛嘅西洋菜甘筍咸鴨腎豬展湯,

飲湯兼食埋湯渣!

當減肥餐都得架!

裝修前執屋,

俾我摷到個N年前係萬寧用印花換嘅孖人牌湯煲,

全新未用過,

老公發現問點解會多個新煲???

答案係:換完擺咗埋一邊,

擺下擺下都唔記得囉!




2016年11月29日 星期二

麵包製作精選實習(特別班)~第三堂


今次麻糬芝麻方包&麻糬丸子黑豆麵包,

由於朋友仔冇返學,

所以我搓埋佢個份,

一次過攞咗2條方包,

10個麵包返屋企呀!


2016年11月28日 星期一

烚下烚下~支竹馬蹄羊腩煲


天氣凍凍哋,

又係時候食羊腩煲啦!

雖然得2個人食,

但絕對冇馬虎,

樣樣配料都買齊,

開飯啦!



2016年11月27日 星期日

數子糖醋骨


平時整糖醋骨會用鎮江醋,

但今次整就用咗陳醋,

味道有咩唔同???

我又覺得差唔多,

一樣咁好味道呀!

 

2016年11月25日 星期五

西芹炒肉片


同豬肉佬熟D係唔同,

每次買豬肉,

話俾佢聽用嚟做咩,

如蒸、炒、炆、煲湯或焗叉燒等等,

佢都會揀舊靚肉俾我;

就好似今次我要買用嚟炒嘅豬肉,

佢就攞咗舊爽肉俾我,

食落有D似豬頸肉,

爽口的,

好味呀!

2016年11月24日 星期四

蜜汁黑椒焗雞膇


自從買咗個蒸焗爐之後,

差不多日日都會用到佢,

唔係用嚟蒸飯和蒸餸,

就係用嚟焗嘢啦!

部機咁貴,

緊係要物盡其用啦!




2016年11月23日 星期三

家鄉蓮藕餅


我都係鐘意食自己整嘅蓮藕餅,

咬落有絲絲蓮藕,

冬菇蝦米有咬口,

加埋豬肉和魚肉,

真材實料,

冇得輸啦!

2016年11月21日 星期一

遊山玩水~惠州


星期六,

我同老公和姑奶3個人返咗惠州;

夜晚就同堂弟婦佢哋一齊食晚飯,

堂弟婦介紹我哋去食羊腩煲,

味道其實唔錯,

不過炆得唔係咁腍,

冇咩牙力就真係食唔到喇!

3斤羊腩煲、客家豆腐、炒油麥菜、荷豆炒肉片和1隻大咸雞(分2碟),

都係食咗290人民幣,

又幾抵食喎!


2016年11月19日 星期六

麵包製作精選實習(特別班)~第二堂

呢堂學整意大利pizza和蒜味蕃茄醬,

薄底脆邊pizza,

(雖然個造型唔係好靚!)😉

但勝在簡單好味又易整,

搵日係屋企要整番個食下先得!


2016年11月17日 星期四

四餸一湯,白飯任裝


今日屋企有麻雀聚會(老公朋友),

做咗半日亞四,

整咗簡單四餸一湯嘅晚餐

白飯任裝,

開飯囉!


2016年11月16日 星期三

蝦醬焗雞翼


平時整蝦醬雞翼,

我都會沾蕃薯粉拎去半煎炸;

今次改用沾麵包糠,

放入焗爐焗,

唔使落油又有脆卜卜嘅效果,

呢個方法唔錯架!


2016年11月15日 星期二

麵包製作精選實習(特別班)~第一堂


上星期二我又開始返學啦!

之前老公問我點解識整麵包仲走去學???

其實好簡單,

咪就上堂同同學仔有傾有講,

開心得嚟又有得食,

所以咪繼續學囉!

今次整黑麥煙肉大蔥麵包和健康燕麥樹枝麵包。


2016年11月14日 星期一

圓肉白合雪耳紅棗糖水


呢個秋涼天氣,

真係好想飲碗糖水滋潤下;

見屋企有齊材料即刻煲嚟飲啦!

一碗熱辣辣圓肉白合雪耳紅棗糖水,

飲到大魔怪Lam Lam脷呀!

(屋企獨欠杞子,下次煲要落番幾粒先得!)


2016年11月13日 星期日

大閘蟹宴


噚日上午去完一日遊,

晚上就同老公去食大閘蟹宴!

受到大閘蟹驗出有二噁英嘅事件,

今次運嚟香港嘅大閘蟹都貼有驗証標籤,

咁我哋就食得放心啦!

由於貨源真係唔多,

老公同學只係攞到24隻大閘蟹(19人分24隻),

慶幸我和老公可以每人食一隻半7兩重大閘蟹

好滿足呀!

(今次7兩重大閘蟹,每隻$170。)



2016年11月12日 星期六

嘉道理農場、流浮山海鮮餐、屏山文物徑一天遊

今日跟姐姐公司去旅行,

嘉道理農場、流浮山海鮮餐、屏山文物徑一天遊,

記得3月份時跟妹妹教會旅行嚟過嘉道理農場,

今次比上次除咗多人之外,

仲多咗好多攤位添!


2016年11月11日 星期五

節瓜冬菇炆支竹


呢半個月大魔怪忙於測驗和功課,

冇返屋企食飯好耐了,

今日襯佢返嚟,

緊係要煮個好味又簡單嘅素菜俾佢食啦!

2016年11月10日 星期四

梅菜豬肉臘腸煲仔飯



今朝天水圍得15度,

又風又落微雨,

自星期一立冬後,

今日終於真係感受到凍嘅滋味啦!

凍凍哋,

我嘅熱辣辣煲仔飯又出爐啦!



2016年11月9日 星期三

馬鈴薯燉肉


馬鈴薯燉肉,

一個簡單又好味道嘅煲仔菜!

今次用咗有皮豬腩肉,

雖然有少少肥,

但食落甘香美味,

唔添飯都唔得啦!


2016年11月8日 星期二

蒜香雞翼


雞翼真係點整都咁好食,

今次用咗小魔怪係英國買俾我嘅蒜鹽,

加埋蒜粉一齊醃,

就係咁簡單,

焗完出嚟雞翼香噴噴,

真係會食唔停口架!


2016年11月7日 星期一

胡椒蘿蔔排骨湯


話說前幾日晚上,

小魔怪係英國whatsapp我,

問胡椒蘿蔔湯點煲???

(佢話英國果邊好凍呀!)

呢個好簡單,

話咁易就煲好有得食喇!

正所謂~冬吃蘿蔔夏吃薑,

加埋胡椒一齊煲,

好暖胃架!

蘿蔔有除痰潤肺、下氣消食、利大小便功效!

想知更多,

可參考~蘿蔔的功效!


2016年11月6日 星期日

蜜汁叉燒



第一次用新蒸焗爐焗叉燒,

效果用普通焗爐差不多,

不過呢個爐火都幾猛,

下次要較底少少爐溫先得!

2016年11月5日 星期六

天水圍濕地公園半天遊


今日天氣好宜郊遊,

唔想去咁遠,

近近哋行下天水圍濕地公園都唔錯架!

入場費成人$30,

小童(3~17)、老人、全日制學生、殘疾人士(及一位同行照顧者)$15,

3歲以下小童免費,

逢星期二休息,

開放時間10:00~17:00。

有興趣入嚟行下嘅朋友仔,

可click入睇睇架~交通工具



2016年11月4日 星期五

娃娃菜油豆腐粉絲肉碎湯


一個簡單嘅餸菜~娃娃菜油豆腐粉絲肉碎湯,

包含菜、肉、豆腐、海鮮、湯,

一鍋攪掂哂,

嘻嘻,

呢個真係打斧頭之首選嚟架!


2016年11月2日 星期三

雜菜牛肉湯配意粉


今晚老公有應酬,

得番我一個人食飯點算好呢???

唔怕,

今朝早煲定鍋雜菜牛肉湯,

當湯飲又得,

配意粉一齊食又得,

得咗!


2016年11月1日 星期二

蝦醬粉絲豆腐卜蒸肉片


蝦醬粉絲豆腐卜蒸肉片,

一定要買半肥瘦嘅梅頭豬肉蒸先好食架!

咪睇呢舊梅頭肉咁肥,

其實蒸出嚟之後豬肉係爽口架!

加埋粉絲和豆腐卜,

索哂蝦醬豬肉嘅肉汁,

今次真係唔添飯都唔得呀!


2016年10月31日 星期一

姬松茸冬菇雲耳蒸雞


今次用咗姬松茸嚟蒸雞,

姬松茸嘅味道滲入哂係碟雞裡面,

好清香,

我鐘意呀!