2015年4月30日 星期四

繼續美港澳之聚~嚐囍煲仔小菜

 
下午有英港澳聚,
 
晚上就有美港澳聚啦!
 
美國代表~Winne Lo,
 
澳洲代表~T&P Pinky,
 
香港代表~靚婆婆、EE、Angle和我,
 
我哋約咗去堅尼地城呢間嚐囍煲仔小菜食晚飯,
 
款款食物都唔錯,
 
多謝靚婆婆嘅好介紹呀!
 


 

2015年4月29日 星期三

英港澳之聚~又一城皇后飯店

 
有朋自遠方來,
 
緊係要出嚟聚一聚啦!
 
英國代表~DaDa Amando Ho,
 
澳洲代表~T&P Pinky,
 
香港代表~雀后,即係我呀!
 
我哋約咗去又一城皇后飯店食午餐,

一路食,

一路傾,

總有傾不完的話題啊!


 

2015年4月28日 星期二

鮑汁螺片炆鴨腳(西生菜)


今次想獨食,

點知又失敗咗添呀!

本來諗住炆餐鴨腳嚟慢慢嘆,

點知小魔怪突然返咗嚟食晚飯,

仲彈呢幾咗句:

做咩今晚咁豐富有鴨腳食呀???

唔該唔好食哂,

我要添飯呀!

2015年4月27日 星期一

香煎牙帶魚

 
好耐冇買過牙帶魚,
 
昨日見街市每份賣$25,
 
於是買份嚟醃咸,
 
今朝煎香嚟食,

咸咸香香,

小魔怪不知食得幾滋味呀!
 
 

2015年4月26日 星期日

涼拌菠菜豆乾

 
大魔怪最愛涼拌菜,
 
今日就整咗呢個涼拌菠菜豆乾,
 
撈埋雪凍就食得,
 
認真快靚正呀!
 

2015年4月25日 星期六

日式麵飽制作精選實習初班(五)


第五堂學香蕉提子卷和日式照燒雞飽;

初初以為麵飽包香蕉、提子和花生醬好難食,

食落又唔太差架,

不過小魔怪就話接受唔到囉!


2015年4月24日 星期五

馬來椰香咖哩雞

 
咖哩,
 
我好鐘意食架!
 
尤甚馬來西亞嘅咖哩,
 
香濃惹味,
 
加埋椰汁就更加very good啦!
 
 

2015年4月23日 星期四

韓式牛仔骨

 
759亞信屋買嘅韓國BBQ牛肉汁,
 
用佢嚟醃牛仔骨真係幾方便,
 
咩調味都唔使加,
 
剩係加少少配料落去,
 
咁又煮咗一味餸啦!
 

2015年4月22日 星期三

土魷冬菇蒸肉餅

 
今朝剁剁剁唔停,
 
全因好想食手剁豬肉餅!
 
土魷冬菇蒸肉餅,
 
係父親大人鐘意食嘅餸菜之一,
 
在天上的父親大人,
 
7年了,
 
依然懷念你啊!
 

2015年4月21日 星期二

日式海帶豆腐

 
今日係百佳買咗呢包硬豆腐,
 
又唔想開支鹵水汁煮佢,
 
見買咗包韓國海帶仲未食,
 
所以簡簡單單煮咗個日式醬油海帶豆腐,
 
大魔怪話都幾好食喎!
 
 

2015年4月20日 星期一

焗薯角

 
只係2個普通薯仔,
 
咁就KO咗大魔怪啦!
 
睇佢見到碟焗薯角就雙眼發光,
 
仲問可唔可以食哂佢喎???
 
哈,
 
緊係冇問題啦!
 

2015年4月19日 星期日

客家梅菜腩肉

 
小魔怪話好耐冇食過梅菜腩肉,
 
諗住摷定D惠州梅菜出嚟架!
 
點知D梅菜全部都係剩番個梅菜芯,
 
搵條葉睇下都冇呀!
 
原來工人姐姐每次蒸魚和蒸豬肉時,
 
都係切梅葉去蒸,
 
唉,
 
真係俾佢激死囉!
 

2015年4月18日 星期六

舊同事聚會~天水圍滿庭芳


每次約舊同事食飯,

次次都唔會約齊人架!

噚日朝口痕係whatsapp約人食飯,

擇日不同撞日,

所以噚晚就約4位舊同事連2小朋友,

走咗去天水圍滿庭芳打邊爐啦!

抵食喎,

大小同價$108兼唔使加一,

汽水和糖水飲食;

食物雖然一般,

但勝在無限時,

可以俾我哋盡情傾下計呀!


2015年4月17日 星期五

涼拌雲耳粉絲


呢兩日天氣開始有點熱,

我的涼拌食譜又出爐啦!

今次整咗呢個涼拌雲耳粉絲,

加咗青瓜絲和甘筍絲,

大小魔怪至愛啊!


2015年4月16日 星期四

鮮魚湯浸勝瓜魚肚肉碎草菇湯飯


今日又係食湯飯,

鮮魚湯浸勝瓜魚肚肉碎草菇湯飯!

專登去街市買咗一份紅衫魚魚毛嚟餚湯底,

好鮮甜呀!

點樣滾到D魚湯奶白色???

就係煎完魚後,

即刻撞大滾水落鑊用大火滾湯,

咁D魚湯就會變奶白色架啦!

2015年4月15日 星期三

2015年4月14日 星期二

素湯~粉葛紅蘿蔔粟米栗子湯

 
原來忘記post呢個素湯水,
 
粉葛紅蘿蔔粟米栗子赤小豆扁豆紅腰豆蜜棗湯(果皮);
 
冇製成品相,
 
因為太好飲,
 
母親大人佢哋每人飲咗幾碗後都冇哂囉!
 

2015年4月13日 星期一

LC無水蒸~豉汁南瓜蒸排骨

 
買咗LC咁耐,
 
真係第一次試無水蒸食譜;
 
今次一滴水都冇落,
 
原汁原味,
 
又唔錯喎!

(下次用玫瑰鍋試下無水蒸食譜先得!)
 

2015年4月12日 星期日

粗粗哋~南乳炆粗齋

 
買咗一大樽南乳過年用,
 
南乳就用得七七八八喇,
 
但剩咗半樽南乳汁,
 
唔要好似好嘥咁,
 
惟有諗諗計用咗佢先得,
 
咁就粗粗哋煮個南乳炆粗齋啦!
 
粉絲索哂D汁,
 
煮多多都唔夠我食呀!
 

2015年4月11日 星期六

大埔慈山寺

 
今日天氣唔係咁好,
 
成日都落住時大時細嘅雨;
 
有幸得到老公朋友邀請,
 
參觀暫未對外開放的大埔慈山寺,
 
這裡環境清淨,
 
感覺非常舒服!
 
慈山寺逢星期一休寺,
 
每日對外開放名額400人,
 
接待團體名額亦只得三團。
 
詳情可登入~慈山寺
 
 
 

2015年4月10日 星期五

日式麵飽制作精選實習初班(四)

 
第四堂學整芝士波波、紅豆波波和椰子提子飽。
 
呢堂好忙,
 
因為要整3樣嘢,
 
連休息時間都冇呀!
 

2015年4月9日 星期四

冬瓜冬菇瑤柱肉粒咸蛋湯飯


照顧完個大仔,
 
緊係要輪到個細仔啦!
 
今朝小魔怪話想食冬瓜粒湯飯喎,
 
哈,
 
呢個超簡單,
 
話咁快朱家湯飯又出爐啦!
 

2015年4月8日 星期三

酥皮芝士菠菜蘑菇素蛋批

 
見大魔怪仲未返學,
 
等我整番個素食蛋批俾佢嘆吓啦!
 
屋企有酥皮,
 
加埋佢至愛嘅菠菜、蘑菇和pizza芝士;
 
嘩,
 
熱辣辣出爐真係香噴噴呀!
 
佢話想成個食哂喎,
 
唔好啦,
 
留番1/4個俾我都好掛!
 
 
 

2015年4月7日 星期二

XO醬青瓜金粟炒蝦仁

 
呢個餸真係集齊冰箱雪櫃嘅食材,
 
炒炒埋埋又一個餸,
 
連老公都話有蝦食,
 
正喎!
 
 

2015年4月6日 星期一

涼拌麻醬手撕茄子&袪濕茶

 
呢兩日真係熱熱熱呀!
 
最慘就係仲要入廚房煮飯,
 
真係想攞我命囉!
 
為咗唔想出汗,
 
我要涼涼涼拌呀!
 
加埋今朝一早煲定嘅袪濕茶(凍飲),
 
舒服哂!
 

2015年4月5日 星期日

又返鄉下啦!

 
差不多1個半月冇返惠州,
 
襯復活節假期,
 
又返上去飲飲食食啦!
 
係惠州鄉下地方食晚飯都幾抵,
 
呢餐食咗180蚊人仔,
 
抵到呢!
 

2015年4月2日 星期四

元朗大力齋廚&B仔涼粉

 
今日Samwei入嚟元朗,
 
緊係要帶佢去食嘢啦!
 
呢排飲飲食食太多了,
 
食番餐素菜都唔錯架!
 

2015年4月1日 星期三

清補涼雞腳豬展湯

 
今日煲咗個最簡單湯水~清補涼雞腳豬展湯,
 
超方便係街買咗一包清補涼,
 
加雞腳、豬展、龍眼肉和蜜棗,
 
好快有得飲啦!