2015年7月31日 星期五

日式麵包制作精選實習中班(六)

濃情軟心朱古力包&Expresso 芒果芝士包

呢兩款麵包真係好食到冇得頂呀!

不過食時一定要小心,

D朱古力餡係會流哂出嚟架!


2015年7月30日 星期四

2015沖繩之旅~Day 2


2015年7月24日

今朝晨早6點起身,

就係為咗嚟呢度沖繩(北部)~萬座毛!

呢度風景靚到呢,

加埋藍天白雲,

真係唔捨得走架!

2015年7月29日 星期三

青紅蘿蔔粟米花膠排骨湯


去日本沖繩玩咗5日,


好掛住我D老火湯呀!


拿拿臨煲番個靚湯飲下先得;


今次加埋花膠仔,


要好好補下骨膠原喇!


2015年7月28日 星期二

2015沖繩之旅~Day 1


2015年7月23日

今朝搭早機(香港航空)去日本沖繩,

開始我哋(姐姐、姐夫和我)5日日本沖繩自駕遊之旅了。

行程由姐姐、姐夫一手包辦,

我就跟衫尾咁嘆世界啦喂!

去到沖繩,

第一時間就係去攞車啦!

原來唔少香港、台灣嘅朋友都選擇自駕遊架!




2015年7月27日 星期一

2015沖繩之旅~手信篇

話咁快5日沖繩自駕遊之旅又完結啦!

今次我唔單買咗好多食嘅嘢,

衫、鞋和少少護膚品咁啦!

最開心係100yen店買咗好多濕濕碎碎嘢,

毛巾、面油紙等等一大堆;

另外,

我仲買咗一大袋迷你包裝嘅零食,

睇落都唔係好多嘢啫!


2015年7月22日 星期三

2015沖繩之旅


各位,我又飛啦!


明日我會同姐姐和姐夫,


嚟個沖繩5日自駕遊,


全程又係吃喝玩樂,


好期待啊!


一陣執好行李後,


就去去姐姐度瞓,


聽朝要5點幾起程去機場呀!


準備吉喼一個,


希望可以裝滿佢返嚟啦!




  


大家可以入嚟Facebook讚下我新開嘅Fans專頁呀! 






2015年7月21日 星期二

日式麵包制作精選實習中班(五)

綠田園菠菜包&居酒屋芝士棒

唔使講呢個包肯定好味道啦!

因為亞sir俾咗超多料,

多到個包都裝唔落呀!

至於個芝士棒呢,

脆卜卜,

都唔錯架!


2015年7月20日 星期一

手撕雞


呢碟手撕雞有咩特別???

特別嘅就係小魔怪親手撕架!

平時見佢剩係識食,

今次就自己動手拆肉,

見佢拆肉又拆得幾細心喎!

咁下次我要俾多幾次機會佢幫手整啦!



2015年7月19日 星期日

西蘭花炒素牛扒粒

食素菜都想有D變化,

今日就用咗素牛扒切粒嚟炒西蘭花;

嘩,

素牛扒充滿黑椒味,

同真牛扒都有幾成相似架!

2015年7月18日 星期六

蠔油肉碎燴豆腐


今日奶奶終於出院啦!

入咗醫院2星期,

奶奶日日都話冇胃口食嘢,

餐餐都係食2~3匙羹粥,

呢次入院令佢瘦得好利害,

老公睇見都好心痛呀!

今晚我煮咗蠔油肉碎豆腐,

濕濕哋易入口,

雖然奶奶都係食咗2~3匙羹飯,

但食得好滋味咁喎!


2015年7月17日 星期五

2015年7月16日 星期四

鹽焗雞扒

天氣真係好熱,

每次入親廚房煮飯,

熱到呢,

煮完都唔想食啦!

所以好多時我都會用焗爐焗嘢,

放入去唔使點理,

反一反,

焗夠時間就食得,

係咪好方便呢!


2015年7月15日 星期三

涼拌豆腐皮蛋榨菜木耳絲



舊同事去台灣玩,


都記得買手信送俾我,


真係要錫哂佢呀! 


今日用咗佢送俾我嘅台灣皮蛋,


整咗個涼拌豆腐皮蛋榨菜木耳絲,


連唔食皮蛋嘅大小魔怪都話好食呀!


(開咗2隻皮蛋都係溏心的。)




2015年7月14日 星期二

梅菜蒸肉片


又一個童年回憶嘅餸菜,

梅菜蒸肉片。

今次用咗係惠州買嘅甜梅菜,

味道真係一流,

好送飯呀!



2015年7月13日 星期一

老黃瓜粟米甘筍土伏苓牛大力湯


今日去咗嘉湖銀座嘅百佳廣場買餸,

見到有個湯包D料都唔錯喎,

老黃瓜粟米甘筍土伏苓牛大力赤小豆扁豆蜜棗,

一pack過樣樣齊都係$32.9,

(份量仲好勁添有1000g架!)

加塊果皮和$30豬展煲佢3個鐘,

咁就有個靚湯飲啦!

煲好湯,

一陣要拎去醫院俾奶奶飲呀!



2015年7月12日 星期日

天后~Texas Burger

 
今日係小魔怪受洗嘅大日子,
 
緊係要食番餐慶祝一下啦!
 
小魔怪帶我兩佬去食美式漢堡包,
 
個漢堡包份量真係幾大份,
 
食到好鬼飽呀!
 
呢餐食咗$441。
 
(地址: 天后電氣道109號地舖)
 

2015年7月11日 星期六

涼拌麻醬雞絲拌萵苣

小魔怪話要食手撕雞,

又話要食萵苣,

今日整咗個涼拌麻醬雞絲拌萵苣,

一次過滿哂佢兩個願意咁多啦!



2015年7月10日 星期五

白汁蘑菇素芝士腸西蘭花意粉



噚日打風的日子,


簡簡單單煮咗個意粉俾大魔怪食,


白汁蘑菇素芝士腸西蘭花意粉;


响素店買咗包素芝士腸,


又幾好食喎!


2015年7月9日 星期四

藍地~農場菜館

噚晚去探奶奶,

佢情況都幾嚴重;

除肺炎外,

血氧量低所以要聞氧氣,

入院3日因為要做好多檢查,

所以唔準飲食,

吊緊抗生素和鹽水,

但我都偷雞俾咗2茶匙湯佢飲。

唉,希望佢乖乖唔好再百厭啦!

之後我哋揸車去藍地食飯,

第一次嚟呢間農場菜館食嘢(藍地季季紅對面),

我覺得唔錯喎!

叫咗個套餐$268,

有1個雙拼小食和3個小菜,

包2碗飯或汽水和糖水或生果,

再叫多個肉骨茶(包1碗飯),

4個人食咗$329。

唯一唔好就係冇車位泊車要泊路邊,

驚驚哋俾人抄牌貴過呢餐呀!


2015年7月8日 星期三

木瓜眉豆花生雞腳豬展湯

 
奶奶肺炎入院,
 
雖然唔準飲食,
 
但我都煲啖湯俾佢,
 
濕下個口都好嘛!
 
 

2015年7月6日 星期一

鹽酥雞軟骨


雞軟骨係一款令人難以抗拒嘅小食,

小魔怪就超級鐘意食喇!

試過街外點一碟要成廿幾三十蚊(得十零粒),

日我買咗一磅返屋企(廿四蚊),

炸起一大碟,

小魔怪食得不知幾滋味呀!


2015年7月5日 星期日

2015年7月4日 星期六

咖哩薯仔牛筋腩


小魔怪真係好鐘意食咖哩,


我一話煮咖哩,


佢即刻話返嚟食飯;


但就投訴點解咖哩有甘筍,


嘻,


因佢亞媽我鐘意食囉!


投訴我會接受,


但做法呢就一切依舊喇!



2015年7月3日 星期五

素湯~瓜粒粟米蛋花豆腐羹


天氣熱成咁,

真係唔想入廚房煲湯喎!

哈,

滾咗個懶人湯水~瓜粒粟米蛋花豆腐羹,

15分鐘就有得飲喇!



2015年7月2日 星期四

蒜香豆豉排骨蒸陳村粉


每次落親元朗,


點可以唔要去吳壁記買陳村粉呢!


好鐘意食蒸咗之後嘅陳村粉,


口感滑嘟嘟,


我多多都食得哂呀!


(元朗牡丹街牡丹樓29號地下)


2015年7月1日 星期三

又嚟元朗CEO K~Lunch

 
天氣咁熱約咗舊同事聚一聚,
 
緊係揀個有得食、有得唱,
 
仲有嘆冷氣嘅地方啦!
 
因為係七一假期,
 
所以每位價錢貴咗少少,
 
(平日$59.9兼要加一)
 
視乎叫咩餐而定啦!
 
早一日book仲免加一添!
 
我哋7個人,
 
唱咗5個鐘頭(10點~3點),
 
食埋個lunch,
 
都係$590咋!