2014年12月31日 星期三

椰菜素餃子

依家街買的素餃子成份唔清唔楚,

我都係唔懶得架喇,

今朝自己動手包咗92隻椰菜素餃子,

今日食咗36隻素餃,

其餘的放入冰箱,

明天拎去妹妹家開party呀!

大仔話呢隻係759亞信屋買嘅胡麻醬點餃子食超正呀!

2014年12月30日 星期二

麵飽製作精選實習高班~第六堂

 
今次呢堂整多穀營養麵包和多穀種麵包;
 
連續兩堂都係整健康包,
 
唔係好受朱家歡迎囉!
 

2014年12月29日 星期一

廣州半日行

 
今日返廣州目的主要係探患病的叔父;
 
母親大人、姐姐和我約咗9點過關,
 
車程都好順利;
 
見到叔父精神唔錯,
 
比年前肥咗醒目咗,
 
仲認得到我添呀!
 
真係要俾十個讚堂姐堂妹24小時貼身的照顧啊!
 
堂姐堂妹真係好熱情,
 
請我哋食午餐外,
 
仲買咗好多手信送俾我哋帶返香港呀!
 

2014年12月28日 星期日

熱香餅

 
今日整咗呢個熱香餅做下午茶,
 
鐘意搽牛油、牛奶、花生醬或糖漿都得,
 
任君選擇呀!
 
今次整得少,
 
唔係好夠分添!
 


2014年12月27日 星期六

黑椒洋蔥牛扒

 
呢個真係懶人餸之最呀!
 
買現成超市醃好的黑椒牛扒,
 
加埋半個洋蔥炒成一碟餸,
 
真係10分鐘都唔使就食得啦!
 
 

2014年12月26日 星期五

木瓜雪耳眉豆花生雞腳瘦肉湯

 
聖誕節係年青人狂歡的大日子,
 
玩通宵唔攰架咩???
 
魔怪由平安夜玩咗2晚呀!
 
今朝一日煲咗木瓜雪耳眉豆花生雞腳瘦肉湯,
 
俾家人潤下呀!
 


2014年12月25日 星期四

柱候蘿蔔支竹炆排骨


聖誕日,

我又要開始清雪櫃嘅物資喇!

今日用咗我至愛嘅柱候醬,

炆咗呢個柱候蘿蔔支竹炆排骨,

有汁撈飯,

真係要煲多幾杯米先得囉!
 


2014年12月24日 星期三

平安夜午餐

 
多謝大家關心,
 
昨日奶奶已經平安出院!
 
適逢今日係平安夜,
 
祝大家聖誕快樂,
 
身體健康!
 
小魔怪晚上有節目,
 
見中午齊人就整個簡單平安夜午餐啦!
 
(蜜椒雞翼、蒜蓉炒西蘭花、忌廉蘑菇長通粉、蜜糖腸仔)



2014年12月23日 星期二

聖誕扒地小食~咖哩豬皮蘿蔔魚蛋魷魚

 
今日為老公公司準備聖誕扒地食物,

煮咗30人份量嘅咖哩豬皮蘿蔔魚蛋魷魚,

哈,

呢次真係大鑊啦!

仲大鑊嘅係雪櫃壞了,

成個冰箱都係寶物,

點算好?

唔通個天想我提早過聖誕節,

煮哂佢哋嚟食?

 
 
今日去老公公司party,
 
我抽到2獎呀!
 

2014年12月22日 星期一

麵飽製作精選實習高班~第五堂

 
今日呢堂整德國黑麥包和德國健康包,
 
同學仔見個包齋齋哋,
 
帶咗D果仁和乾果返嚟俾大家用,
 
嘻嘻,
 
多謝哂呀!
 

2014年12月21日 星期日

冬至晚餐(附蔥頭雞食譜)

 
每年冬至,
 
母親大人和妹妹一家都會嚟我家齊齊過節;
 
今晚提早一日過節,

簡簡單單的一餐,
 
最緊要大家食得開心呀!
 


 

2014年12月20日 星期六

芝士焗風琴薯仔

 
大魔怪話好想食焗薯,
 
屋企得一個薯仔,
 
點算好呢???
 
整個芝士風琴焗薯,
 
睇落食落都夠飽啦!
 
 

2014年12月19日 星期五

生菜雞蛋肉碎粥

 
呢幾日天氣轉冷,
 
98歲奶奶的舊患~骨痛又發作,
 
已經有1日唔肯落地自己行,
 
一早煲咗生菜雞蛋肉碎粥俾佢食,
 
食食下發覺佢左膝蓋腫脹了,
 
即刻call救護車送佢入院,
 
經一輪檢查後,
 
需要留院觀察和接受治療,
 
應該要住院1~2日,
 
祝早日康復!!
 

2014年12月18日 星期四

素雜錦鍋


近排大魔怪考試,
 
佢唔係日讀夜讀的人,
 
總會抽時間上網打機和睇戲,
 
好似讀得好輕鬆咁,
 
佢份人就係咁咩都唔知驚;
 
讀書嘅嘢我幫唔到佢,
 
唯有煮多D嘢食俾佢啦!

每次見佢食得滿足,

我嘅任務已完成了。
 
 

2014年12月17日 星期三

菜乾蠔豉雞絲瑤柱粥

 
上個月頭miss咗一年一度洗牙嘅大日子,
 
好彩政府牙科護士可以俾我補番今日下午再去,
 
前兩日仲有電話留言提我添;
 
次次洗完牙肯定會牙軟,
 
所以煲定煲粥今晚可以食呀!


2014年12月16日 星期二

白汁芝士焗西蘭花

 
大魔怪好鐘意食白汁芝士焗西蘭花,
 
佢可以成碟食哂都得,
 
而我就鐘意食蘑菇和粟米芯啦!
 
各有所好呀!




2014年12月15日 星期一

蟲草花淮山圓肉杞子雞腳瘦肉湯


呢排天氣又乾又凍,

即刻煲D滋潤湯水飲下先得囉!

拿,

呢個湯真係幾好架,
 
有滋肺補腎護肝、抗氧化、防衰老、抗菌抗炎、鎮靜、降血壓、
 
提高機體免疫能力等功效,
 
男男女女都啱飲架!
 

2014年12月14日 星期日

巡視業務

 
今次返惠州,
 
最主要係睇下間屋起成點???
 
中午返去第一時間就係醫肚啦!
 
食咁多嘢都係270人民幣,
 
真係平過自己煮呀!
 
麥包係老細送嘅,
 
免費架!
 
 

2014年12月13日 星期六

麵飽製作精選實習高班~第四堂

 
今堂學整裸麥麵包和英式鬆餅。
 
亞sir醒咗塊豬柳扒俾我哋夾鬆餅食,
 
嘻嘻,
 
得1塊豬柳唔夠喉囉!
 
如果有埋蛋就變豬柳蛋漢堡啦!
 

2014年12月12日 星期五

豉汁蒸倉魚

 
小魔怪和我都好鐘意食魚,
 
噚晚蒸咗條黃立倉,
 
真係連骨都俾我哋啜埋,
 
唔通我哋前世係隻貓???

喵!
 
 

2014年12月11日 星期四

香檸煎雞扒

 
老公好鐘意自己沖檸茶飲,
 
所以屋企緊有一兩個檸檬係雪櫃;
 
但依家D檸檬真係唔平,
 
最貴試過5蚊先得1個,
 
真係要好好利用佢先得囉!
 
 

2014年12月10日 星期三

青紅蘿蔔花膠湯

 
青紅蘿蔔湯係朱家家常例湯之一!
 
咪睇佢咁普通呀,
 
其實佢好有營養架!
 
加埋花膠仔一齊煲,
 
嘩,
 
我已經充滿骨膠原啦!
 

2014年12月9日 星期二

鹽焗三文魚頭

 
前排同小魔怪去食日本嘢,
 
叫咗碟鹽焗三文魚骹食,
 
上碟得2件收我$28,
 
貴到飛起;
 
唔抵得即刻買個三交魚頭返嚟,
 
自己整嚟食好過啦!

食時蘸少少七味粉,

夠哂惹味呀!
 
 
 

2014年12月8日 星期一

生炒臘味糯米飯

 
天氣凍凍哋,
 
食碗熱辣辣生炒臘味糯米飯,
 
就very good啦!
 
除此之外,
 
冬天仲有咩嘢想食呢???
 
 

2014年12月7日 星期日

南乳炆蓮藕

 
煮素菜俾大魔怪食好簡單,
 
佢鐘意食蓮藕、支竹和豆腐卜,
 
加多少少材料,
 
一個惹味素餸出場啦!

 

2014年12月6日 星期六

玉子豆腐燴肉碎

 
好鐘意食玉子豆腐,
 
滑滑的,軟軟的,
 
啱哂大人細路哥;
 
嘻,
 
懶人煮餸,
 
真係話咁易啦!
 
 

2014年12月5日 星期五

驅寒首選~咸菜胡椒豬肚排骨湯


天氣一凍,
 
就好想飲呢個湯架啦!
 
但次次煲親呢個湯,
 
錢唔係問題,
 
最大問題係要自己洗豬肚呀!
 

2014年12月4日 星期四

返嚟啦!

 
星期三,
 
我和姑奶返咗惠州一轉,
 
姑奶幫堂妹買藥,
 
而我就順便返去睇下間屋整成點!
 
好在早知天氣會轉涼,
 
帶咗足夠衫返去著,
 
唔係凍親就唔抵啦!
 
晚上打完麻雀凍凍哋,
 
走咗去飲豬肉湯,
 
我仲試新嘢,
 
飲枸杞豬雜湯。
 

2014年12月3日 星期三

麵飽製作精選實習高班~第三堂

 
今次呢堂學整香草薯仔包和藍草莓鬆餅(美式muffin),
 
兩款我都鐘意食,
 
雖然上堂前我食咗飯,
 
但一出爐時,
 
我都要食番個包包和蛋糕先,
 
你哋話我咁為食,
 
我點減肥吖!
 
 
 

2014年12月2日 星期二

自製叉燒兩食

 
買咗舊靚梅頭肉($50),
 
肥瘦適中,
 
第一時間緊係要用嚟醃叉燒啦!
 
其實焗多少少都唔怕,
 
可以留嚟炒烏冬,
 
又可以煮叉燒炒蛋,
 
所以話一舊叉燒都可以用得好盡架!
 
嘻嘻!
 
 

2014年12月1日 星期一

燒烤晚會

 
 
噚日,
 
老公、小魔怪和我,
 
入咗元朗舊屋度參加燒烤晚會;
 
食盆菜就食得多,
 
今次係第一次攪BBQ,
 
仲要係唔使自己燒,
 
有專人服侍攞D嘢食埋位,
 
哈哈,
 
真係好鬼正囉!
 
 

2014年11月30日 星期日

黑糯米椰汁糕

 
老公話想整D甜品拎返公司請同事食,
 
問我可唔可以幫佢整???
 
米飯班主叫到,
 
點可以托手踭,
 
即刻買齊材料開工呀!
 

2014年11月29日 星期六

客家梅菜炆雞翼


惠州梅菜出哂名靚係人都知,
 
所以每次返親去,
 
我都會入貨;
 
自從母親大人食過我買嘅惠州梅菜,
 
佢話未試過咁好食,
 
仲吩咐我以後唔使買咩手信俾佢,
 
剩係每次帶幾斤梅菜俾佢就得喎!

2014年11月28日 星期五

香煎秋刀魚

 
嘩,
 
真係食水深囉!
 
出街食條秋刀魚要成十幾廿皮,
 
今日去佳寶買一pack都係10蚊,
 
仲有4條添呀!
 
小魔怪一見到條秋刀魚,
 
唔理三七廿一,
 
即刻夾番條魚俾自己慢慢嘆,
 
咸咸香香,
 
正呀!
 
 

2014年11月27日 星期四

蔬菜燉牛肉

 
今日煮呢個蔬菜燉牛肉,
 
加咗我喜歡的蔬菜,
 
蕃茄、甘筍、西芹、薯仔和洋蔥,
 
簡單調味,
 
已經好清甜啊!
 
 

2014年11月26日 星期三

五指毛桃土伏苓豬展蜜棗湯

 
呢個五指毛桃土伏苓豬展蜜棗湯,
 
我係惠州成日飲架,
 
佢有清熱祛濕,
 
清肝潤肺等功效架!
 
 

2014年11月25日 星期二

麵飽製作精選實習高班~第二堂

 
今日學整綠茶方包、玉桂果子包和牛油排包。
 
亞sir話之前有同學仔反映綠茶方包好齋,
 
於是佢加咗D紅荳蓉俾我哋,
 
簡直好味道到冇朋友呀!
 

2014年11月24日 星期一

南瓜薯仔忌廉湯

 
上星期係惠州搬咗個南瓜返嚟,
 
擺咗咁多日,
 
終於切開佢嚟整南瓜薯仔忌廉湯;
 
仲學日整忌廉花添,
 
嗚嗚,
 
好失敗呀!
 
 

2014年11月23日 星期日

惠州行

 
我啱啱由惠州返嚟啦!
 
呢次陪姑奶、姨甥和祺祺一齊去回鄉探親,
 
姨甥起碼超過30年冇返過惠州啦!
 
午餐食農家菜,
 
晚餐飲夜茶!



2014年11月21日 星期五

脆皮燒腩仔

 
諗諗下,
 
真係有年幾冇焗過燒肉食啦!
 
今日見百佳有舊靚靚豬腩肉,
 
即刻買番嚟焗燒肉先得!
 
好耐冇整,
 
唔知有冇失手呢???
 

2014年11月20日 星期四

日式咖哩蘑菇飯

 
大魔怪話想食咖哩,
 
日式咖哩就最啱佢啦!
 
可惜我呢個亞媽矇查查,
 
攞咗盒辛辣咖哩煮俾佢食,
 
日式咖哩唔係唔辣架咩???
 
亞仔,
 
都係少少辣之嘛!
 
 

2014年11月19日 星期三

栗子炆雞翼

 
秋冬天係食栗子嘅時候啦!
 
今日就買咗包嚟炆雞翼;
 
去栗子皮好簡單,
 
煲少少熱水放入栗子焗一陣約3分鐘左右,
 
逐少取出襯熱用刀輕輕挑起栗子皮,
 
咁就好易撕開栗子皮o架啦!
 

2014年11月18日 星期二

大芥菜排骨湯

 
唔知係咪食黑豆炆羊肉補得勁呢,
 
我個喉嚨好似有少少痛痛哋,
 
即刻攞咗惠州帶番嚟果棵大芹菜,
 
滾個下火湯水飲下先得!
 
 
 

2014年11月17日 星期一

惠州飲滿月酒

 
由於星期日要返惠州飲滿月酒,
 
所以星期六同姑奶一早返咗惠州,
 
老公就星期日一早趕過嚟!
 
返到去堂弟屋企,
 
即刻有好嘢食!
 
黑豆馬蹄竹蔗蚊羊腩,
 
好補身啊!
 
 

2014年11月15日 星期六

麵飽製作精選實習高班~第一堂


又到返麵包高班的大日子啦!
 
學搓包真係好鬼開心,
 
同同學仔又傾又講,
 
話咁快3個鐘又過咗;
 
每次見到D新鮮麵包出爐,
 
真係幾難忍口唔食佢架!
 
今堂學整英式方包、法式蒜蓉包和肉鬆包。
 

2014年11月14日 星期五

臘味煲仔飯

 
哈哈,
 
一早食臘味煲仔飯,
 
係咪過份咗少少呢!
 
好在有小魔怪陪我一齊食咋!
 
 

2014年11月13日 星期四

北菇棉花雞


香港飲茶,
 
我有飲茶四寶,
 
就係蝦餃、燒賣、鳳爪和棉花雞啦!
 
尤其最鐘意食棉花雞入面塊魚肚,
 
索哂D汁特別好味道呀!
 

2014年11月12日 星期三

燒排骨

 
今日一早去百佳買定幾條靚一字排,
 
早早醃定諗住焗燒排骨啦!
 
點知焗完之後個個都話唔返嚟食飯,
 
佢哋唔食,
 
等我慢慢嘆先得!

2014年11月11日 星期二

懶人飯~咖哩洋蔥肉碎飯

 
女人,
 
總有幾日心情是悶悶的;
 
而且特別懶,
 
懶到咩都唔想做!
 
今日又俾個藉口自己,
 
做個懶人飯先得!