2013年12月31日 星期二

炸南瓜&茄子

 
講明,
 
呢個真係2013最後一炸~炸南瓜片&茄子,
 
咁2014就可以另計喇!
 
今晚有節目,
 
我同老公會去姐姐家BBQ,
 
祝大家元旦快樂!
 
 

2013年12月30日 星期一

淮山圓肉黨參杞子紅棗瘦肉湯

 

除咗冰箱凍肉要清外,

連雪櫃裡藥材都要清減D呀!

簡簡單單煲咗個藥材湯水,

補氣、健脾、補血養心、明目,
 
嘩,咁多好處,
 
快D飲番碗先得!
 
 

2013年12月29日 星期日

素春卷

哈哈,
 
晨早流流唔知挑起條咩筋~好想食炸春卷,
 
拿拿臨買齊材料開工;
 
今次唔落肉,
 
整素春卷呀!
 
 

2013年12月28日 星期六

西多士

年青人即係年青人,
 
放假唔係出街就係留係屋企打機,
 
日日玩到夜一夜都唔瞓,
 
朝早都唔使旨意見到佢一面;
 
早餐午餐下午茶一齊食,
 
呢D咪叫做青春囉!
 

2013年12月27日 星期五

蘿蔔魚肉煲


聖誕終於過咗,
 
嚟緊又就嚟到元旦;
 
唔想餐餐大魚大肉,
 
襯呢段時間,
 
都係要食得清啖D囉!

2013年12月26日 星期四

自製忌廉蘑菇湯

 
聖誕日整嘅蘑菇湯係自家製的,
 
由於大魔怪唔係屋企食飯,
 
所以個湯加咗雞湯,
 
素食人仕就唔好落雞湯,
 
落水煮就得啦!
 
 
 

2013年12月25日 星期三

聖誕扒地

 
每年聖誕節,
 
我哋家人都會舉行一個小型聖誕扒地;
 
每個家庭整2~3款餸菜一齊食,
 
飯後又有交換禮物活動,
 
可惜今年大小魔怪都冇參加,
 
少咗一份熱鬧呀!
 
今日幸運之神眷顧我和老公,
 
天水圍雙煞又重現江湖啦!
 
 

2013年12月24日 星期二

聖誕快樂

 
 
 
今日係平安夜,
 
本來以為得我哋3位老人家係屋企過節,
 
點知小魔怪冇約朋友去玩,
 
留係屋企陪我哋食小型平安夜晚餐呀!

2013年12月23日 星期一

2013年12月22日 星期日

冬至快樂

 
今日係冬至,
 
母親大人和妹妹一家都嚟齊齊過節,
 
最快靚正食法緊係打邊爐啦!
 
今次食得健康,
 
剩係用咗甘筍蓮藕粟米煲咗個湯底(加鹽調味),
 
好鮮甜啊!
 
 

2013年12月21日 星期六

2013年12月19日 星期四

欖菜乾扁素四季豆

 
今朝起身得7度,
 
真係超想繼續留係被窩度瞓多陣;
 
連日鼻敏感發作,
 
鼻水長流,
 
好辛苦啊!
 

2013年12月18日 星期三

南乳蓮藕炆豬手


我嘅口味真係好似父親大人,
 
喜歡吃濃味的餸菜;
 
細細個時,

每當母親大人煮南乳炆豬手,
 
我肯定可以食兩碗飯,
 
好懷念啊!
 
哈哈,
 
還掂都係,
 
今次用個大鑊炆, 

名副其實好大鑊呀!


2013年12月17日 星期二

熱辣辣~雜錦鍋


落雨落咗成晚,
 
到依家都未停過;
 
今朝又風又雨,
 
真係唔願起身,
 
起身後又唔想落街買餸添!
 
懶筋又發作,
 
煮個雜錦煲暖暖身先得!
 

2013年12月16日 星期一

冬天送暖~花膠螺片湯


冬天有碗熱辣辣嘅熱湯飲,
 
真係好溫暖架!
 
一早落街買哂材料,
 
煲定靚湯,
 
俾我心愛的人飲呀!
 
 
 

2013年12月15日 星期日

下午茶~吞拿魚飛碟


前兩日執廚房,
 
俾我摷番個飛碟機出嚟,
 
大大話話呢部機冇十年都有八年,
 
仲未壞,
 
唉,
 
冇得買新機添!
 

 
 

2013年12月14日 星期六

花椒雞腿

12月就嚟過咗一半啦!
 
 
仲有十零日就聖誕節,
 
大家有冇節目呀???
 
我就未有著落,
 
今年應該冇得出外玩,
 
要留係屋企過啦!
 

2013年12月13日 星期五

薯仔沙律!


天寒地凍,
 
我家三個男人指定話要食沙律,
 
仲話沙律可以當飯食都得喎!
 
唔係嘛,
 
沙律當飯食???
 
咁我咪要整座沙律山先夠佢哋食???

都係求求其其整個薯仔沙律應酬下佢哋先得!

2013年12月12日 星期四

殘忍飯又出爐~窩蛋牛肉煲仔飯

 
呢幾日天氣涼涼哋,
 
又係食殘忍煲仔飯嘅時候啦!
 
今朝做完瑜珈拿拿臨去街市買新鮮牛肉,
 
加埋我最鐘意嘅馬蹄粒,
 
真係要食多幾碗嘆下先得啦!

本來想落生蛋,

不過依家風頭火勢(H7N9),

都係焗一焗佢穩陣呀!

蔬菜食譜

2013年12月11日 星期三

粟米餅


好鐘意用呢包印尼粉整粟米餅,
 
咩調味都唔使加,
 
只要落蛋、水、粟米和蔥花攪勻就得,
 
工人姐姐話,
 
呢包粉仲可以用嚟炸蝦、雜菜、薯仔和豆腐添!
 
炸出嚟嘅質感係粟米餅邊邊係脆脆的,
 
但內裡是軟軟的,
 
好特別啊!
 

 

2013年12月10日 星期二

自製南瓜素湯配烤麵包粒

 
我哋有肉骨茶飲,
 
咁大魔怪飲咩呢???
 
所以整咗個南瓜素湯俾佢,
 
慳慳哋將麵包切粒粒兼焗得燶燶哋,
 
配埋一齊食又幾正喎!
 

2013年12月9日 星期一

肉骨茶

噚日煲咗肉骨茶,
 
用咗姐姐係新加坡買俾我嘅手信~松發肉骨茶;
 
同我平時飲開嘅肉骨茶有好大分別,
 
好香胡椒味,
 
啱我呀!
 
我冇落醬油和醬清,
 
(我諗應該係蠔油和豉油)
 
加鹽已經好好味道啦!
 
 

2013年12月8日 星期日

白汁芝士焗雙蔬


今日興致勃勃地同老公揸車,
 
諗住入大棠郊野公園睇紅葉,
 
點知超多人兼多車,
 
塞車塞咗好鬼耐,
 
條路又窄,
 
D人又亂咁泊車,
 
警察嚟到又唔抄牌,
 
攪到老公鬼死咁慶,
 
嘈都冇用,
 
掉頭返屋企囉!
 
 
 

2013年12月6日 星期五

2013年12月5日 星期四

椰奶芋頭雞


上次整完南乳芋頭炆鴨俾小魔怪食,
 
今次又整咗椰奶芋頭雞俾佢嘆下;
 
佢見到不知幾開心,
 
仲問: 媽咪,點解妳對我咁好嘅???
 
仔亞仔,
 
 
一個係我心肝,
 
一個係我命椗,
 
唔錫你哋錫邊個呀!
 

2013年12月4日 星期三

椰香黃咖哩炆牛展


又到清雪櫃冰箱嘅時候啦!
 
唔清邊有位再入貨吖,
 
今次要清嘅係牛展;
 
鹵水牛展成日食,
 
今次改用黃咖哩,
 
包黃咖哩係姐姐去新加坡公幹時買俾我架!



2013年12月3日 星期二

五香雞翼

以前食雞翼,
 
煮哂2磅都未必夠大小魔怪食;
 
依家???
 
2磅雞翼要分兩餐,
 
變相慳慳慳唔少$$$!
 

2013年12月2日 星期一

蕃茄薯仔紅蘿蔔煲三文魚頭湯

 
噚晚睡姿瞓得唔好,
 
攪到今朝起身瞓厲頸,
 
痛到吖!
 
唔知今日煲嘅三文魚頭湯,
 
可唔可以補頭呢?
 
哈哈!
 

2013年12月1日 星期日

慳水慳力老人餐~雜錦鍋!


今晚又係食老人餐,
 
得奶奶、老公和我三個人食飯;
 
奶奶最低要求係有熱飯食就得,
 
超簡單啦!
 
一煲過攪掂,
 
碟都唔使洗呀!