2013年2月28日 星期四

咖哩雞!

好鐘意用利川咖哩整咖哩雞,

簡單又好味道,

撈汁食飯更加一流呀!

拔,

咁好味,

真係越食越想食,

我要減肥啦!



2013年2月27日 星期三

香煎鱭魚!


係街市見到一D唔識嘅魚,

以我咁八掛,

梗係要問過清楚啦!

亞姐話呢D叫鱭魚,

用嚟炸好好食喎!

未試過喎,

一於買嚟試下啦!

  

2013年2月26日 星期二

鮮菠蘿咕嚕肉!

朱家上上下下都喜歡食酸酸甜甜嘅餸,

尤其係大小魔怪,

未開飯已經頻頻偷食,

就嚟食哂D餸架啦!



2013年2月25日 星期一

朱家日式燒餅!

屋企有幾包鰹魚碎,

最啱用嚟整燒餅架啦!

係759買咗包日式燒餅粉和燒餅汁,

加埋屋企有嘅物料,

朱家日式燒餅食得啦!

燒餅粉包裝上全都是日文,

又要考考我嘅理解力啦!




2013年2月24日 星期日

下火湯水~芫荽皮蛋魚片湯!

 
今日我仍然失聲,

可能我大多火啦!

要煲番個下火湯水飲下先得!

大小魔怪唔係咁鐘意飲芫荽湯,

要逼先肯飲半碗,

仲飲到好似飲苦茶咁呀!





正月十五~元宵節晚餐!

今日係正月十五中國情人節~元宵節嘅大日子,


適逢大伯一家和姑奶過嚟食飯兼拜年,

12人9餸1湯,

白飯任裝呀!

2013年2月23日 星期六

有咩冬瓜豆腐呢???

過年食得多煎炸嘢,

都係食番D清清哋嘅嘢,

唔係有咩冬瓜豆腐就唔知點算好囉!

用2碗半清雞湯加半碗水炆淋冬瓜,

加埋煎咗嘅魚肉豆腐卜,

埋個蠔油獻,

咁就食得啦!



2013年2月22日 星期五

冇feel!

今日香港有地震我feel唔到喎!

剩係知買完餸後,

熱到CC下,

即刻行去屋企附近小型甜品店,

叫番碗芒果西米露食下先得!

原來呢個西米露有套餐,

加5蚊就有咖哩魚蛋和茶葉蛋,

呢度$28呀!

2013年2月21日 星期四

中咗六合彩,不過唔係我!

 
如題,


中咗六合彩,
不過唔係我!
同事係過年前中咗六合彩,
所以今日請我哋食飯慶祝!
希望同事中多幾次六合彩,
咁我哋就有好多餐食啦!
我哋又係去元朗正記食晚飯呀!


2013年2月20日 星期三

今晚食咩餸~椒鹽雞翼&紫菜肉丸湯!

 
每日食咩餸???

我真係冇plan架,

去到街市見到有咩賣就買咩返屋企煮;

今日我連街市都冇去,

去超市買袋雞翼返屋企就算囉!




2013年2月19日 星期二

上湯虎蝦燴伊麵!

諗住買定盒虎蝦過年時食啦!

點知日日都咁忙,

都冇時間煮嚟食,

今日終於的起心肝煮咗佢啦!



2013年2月18日 星期一

2013年鄉情~田園篇!

 


2月13日(初四),

果朝早4點先瞓,

9點幾起咗身,

所有人都未醒,

有咩做???

叫醒姑奶和老公一齊落田摘菜啦喂!

2013年2月17日 星期日

祈祈BB兩歲啦!

唔經唔覺,

祈祈BB兩歲啦!

正日生日係2月18日,

不過妹妹噚晚為祈祈BB開咗個小型生日會!

祝祈祈BB聽聽話話,

快高長大,

孝順父母,

唔好成日發小姐脾氣啦!

妹妹係呢個新年裡面,

聽得最多嘅說話係:

點解祈祈咁似妳二家姐架!

妹妹佢哋超唔願聽,

而我就超開心囉!

2013年2月16日 星期六

2013年鄉情~飲食篇!

 
呢兩日我哋3個人真係全程食食食,

姑奶和老公最開心,

因為佢哋好懷念呢D家鄉餸架!

尤其個肥豬肉和超新鮮嘅雞紅呀!

拔,

我見到就驚驚哋囉!

2013年2月15日 星期五

朱家例湯~西洋菜紅蘿蔔咸鴨腎排骨湯!(加果皮)

 
又係朱家例湯呀!

每次煲親呢個湯,

大小魔怪唔係用飯碗飲架,

而係用大湯碗,

起碼每人飲3大碗以上,

仲要食埋湯渣,

一D都唔嘥架!



2013年2月14日 星期四

情人?情人!

 


我有3位情人~老公及大小魔怪!

係西方情人節,

唔一定要食西餐,

只要情人食得開心,

日日都係情人節呀!




材料: 新鮮豬蹄一隻、薑片6-8片、薑段、八角3粒、蒜頭3粒、

乾蔥頭2大粒、生菜2棵、2茶匙粟粉(水)

調味: 生抽2湯匙、老抽6湯匙、冰糖3大粒、6碗水

做法: 豬蹄用薑片、蔥段和紹酒1湯匙出水10分鐘;

取出用水沖洗後,用刀沿豬骨邊界開取出豬骨;

抹乾水份後用老抽搽勻豬蹄半小時;

燒熱油鑊,放入豬蹄煎炸豬皮表面後撈起沖水備用;

燒熱鍋加少許油爆香八角、薑片、蒜頭、乾蔥頭,

加入調味和豬蹄,先用大火炆至滾起,

再轉細火炆兩小時後熄火,唔好開蓋繼續焗至臨食前,

再翻炆多半小時;灼菜放碟,撈起豬蹄放上菜面,

隔去汁內雜物,將1碗汁加少許生粉埋獻汁,

淋在元蹄面便成。
 
 

大家可以入嚟Facebook讚下我新開嘅Fans專頁呀!
 

 

2013年2月13日 星期三

2013年鄉情~手信篇!

 
噚日,

姑奶、老公和我齊齊返中國惠州,

果度係老公家鄉嚟架!

連續3年我哋都有返中國過年探親,

得到老公的弟弟和弟婦熱情款待,

我們真是滿載而歸,

又食又拎呀!

(自家種蔬菜)

2013年2月12日 星期二

大年初三!



cny20l.gif


今日係大年初三~赤口,

請大家食件自家製XO醬蘿蔔糕,

祝大朋友步步高陞!

小朋友學業進步!

一陣我、老公會返中國惠州探親,

明天初四先返香港,

到時再同大家拜年啦!




 
大家可以入嚟Facebook讚下我新開嘅Fans專頁呀!



2013年2月11日 星期一

大年初二!



今日係大年初二,

亦都係我和老公結婚廿年嘅紀念日!

人生有幾多個廿年???

同以往一樣冇咩表示,

廿年如一日;

佢係一個闊佬人哋,

對自己好慳嘅人;

拔,

咁都唔好將我變成自己人先得架,

我都好想你闊佬我囉!

今朝食過開年飯,
我哋又出動去拜年啦!


2013年2月10日 星期日

大年初一!



今日係大年初一,

我雀后祝大家:

心想事成、

身體健康、

萬事如意、

步步高陞、

笑口常開、

財源滾滾、

新年快樂!


每年年初一朱家全日食齋,

食過初一早飯後,

我哋要出發去拜年啦!

2013年2月9日 星期六

朱家團年飯!


 


今日年廿九,

我由朝忙到晚,

原因係今晚係朱家食團年飯嘅大日子!

母親大人和妹妹一家齊齊過埋嚟團年呀!

2013年2月8日 星期五

2013自家製蘿蔔糕~出爐啦!

 


今日又係蒸糕嘅時候啦!

每年我都係蒸一款糕~蘿蔔糕!

今次蒸咗兩底糕,

一底原味係母親大人嘅,

另一底係XO醬蘿蔔糕係我哋嘅!

嘻嘻,

仲有我嘅至愛~心心頭啖糕!



 
 
材料: 3個蘿蔔(約5斤多少少)、粘米粉一包(600g)、臘腸4條、

臘肉1條、蝦米4兩、薑數片、冰糖1小粒和浸蝦米水1碗

調味: 鹽2.3茶匙、胡椒粉適量(按自己喜好落鹽調味)

做法: 蘿蔔去皮洗淨刨絲;臘腸、臘肉蒸熟切粒備用;蝦米浸軟;

唔使落油爆香臘味和蝦米後盛起;

唔使洗鑊加薑片炒蘿蔔絲滾起後加冰糖,

煮至蘿蔔變透明色,(如水多不用加蝦米水)

落臘味和蝦米攪勻,加鹽和胡椒粉調味熄火,

將1包粘米粉逐少分3-4次左右加入蘿蔔絲裡,

不斷攪拌至粉和蘿蔔絲混合為止,

隔水蒸1.5小時便成。(記得留番少少臘味舖係蘿蔔糕面)

(XO醬蘿蔔糕係蒸完先將XO醬放入面o架!)


 




大家可以入嚟Facebook讚下我新開嘅Fans專頁呀!