2012年8月28日 星期二

自製麵條~薑蔥手撕雞撈麵!


今日太陽伯伯好勤力呀!

曬到我CC下,

我諗元朗起碼有成36-37度,

真係熱到人都顛呀!

返到屋企大小魔怪已經開咗冷氣,

好舒服呀!

不過當收到電費單時,

我就會冇眼睇啦!
 

麵條做法:
材料: 高筋麵粉300g、低筋麵粉200g、鹽半茶匙、水225g

做法: 將麵粉、鹽和水混合,水要慢慢加入麵粉中,

由鬆散麵糰搓成光滑唔黐手,用濕布蓋著等30分鐘,

取出麵糰切開4份,用擀麵捧擀平後,

放入壓麵機調教9度壓麵糰兩次,

再調教7度和4度壓麵糰,灑少許麵粉在麵皮上,

放入切麵機中切成粗條;將麵條放入滾水中出水後,

加入喜愛的材料或湯料,就有好味嘅自家麵食啦!


薑蔥手撕雞做法:
材料: 芽菜半斤、雞1隻、蒜蓉、乾蔥蓉、薑蓉和蔥粒
醃料: 鹽1.5茶匙、玫瑰露酒半湯匙

調味: 豉油1湯匙、老抽半湯匙、糖1茶匙、麻油少許和蒸雞汁3匙羹

做法: 雞用鹽和玫瑰露酒醃半天;芽菜去頭尾用鹽水烚30秒,

撈起瀝乾水份備用;蒸雞25分鐘後焗多5分鐘,
待涼拆肉,

將雞肉放在芽菜面;
燒熱油鑊爆香將蒜蓉、乾蔥蓉和薑蓉,
加入調味料內與雞絲、芽菜和蔥粒撈埋便成。



 
 

 
 

大家可以入嚟Facebook讚下我新開嘅Fans專頁呀! 
 


 

沒有留言 :

張貼留言

如果大家覺得我煮嘅餸菜啱哂口味嘅話,不妨留個言,鼓勵下我啦!