2011年11月30日 星期三

蓮藕炆豬軟骨!


今日下午睇見旺角火警嘅新聞,

真係令人好唔開心呀!

願死去的能安息,

受傷的盡快康復。

人在做,天在看,

希望警方能盡快搵出縱火兇徒啦!



2011年11月29日 星期二

三文魚頭蕃茄薯仔紅蘿蔔湯!

食咗兩日西藥,

飲水都飲到口淡淡呀!

所以今日滾咗個營養豐富又好味道,

三文魚蕃茄薯仔紅蘿蔔湯!

好鮮甜啊!

(呢個三文魚頭係百佳買o架!)



2011年11月28日 星期一

病假!



今日終於去咗睇醫生啦!

醫生話我因感冒和喉嚨發炎引致失聲,

所以今日課室少咗一把鬧人嘅聲音,

我諗小朋友都不知幾高興呀!

攞咗一大袋藥,

買定一碗外買粥,

食完藥就覺覺豬咗一陣;

今日我休息一天,

由工人姐姐煮餸呀!

2011年11月27日 星期日

砵仔荷香糯米蒸排骨!

真係唔好講自己冇病呀,

上星期我仲同人講自己呢排都不知幾健康,

話口未完,

星期五已經開始作病,

喉嚨痛、頭痛、流鼻水等一齊嚟探我,

昨日我同老公去參加佢嘅小學同學會,

連埋今日全日係屋企休息,

不過仲未好得哂,

睇怕再係咁我都要睇醫生囉!

前日煲完糯米飯,

仲有1杯多少少嘅糯米係度,

費事又擺度,

等我搵D嘢攪攪佢先得!



2011年11月26日 星期六

臘味糯米飯+五分鐘靚湯水!

原來善忘唔係我專利嚟o架!

話說老公專登去買麵包,

點知俾咗錢唔記得攞麵包;

工人姐姐買白蘿蔔,

又係俾咗錢唔記得攞;

最後佢哋要再落街去攞番D嘢呀!



2011年11月24日 星期四

食西餐!

值得慶祝呀!

小魔怪係學校攞咗個學科獎,

係中國歷史全級第一;

雖然唔係一個好大嘅獎,

但係父母心目中已經好叻,

希望佢能夠繼續努力讀書啦!

所以應佢嘅要求今日食西餐。



2011年11月23日 星期三

海參炆排骨!

唔好問我點發海參,

呢D咁難攪嘅嘢,

發得好就好,

發得唔好成煲會冇哂,

所以通常我都會搵賣俾我嘅藥材舖伯伯幫我浸發o架,

浸完咪分幾袋袋好,

攞番屋企放入冰箱,

食時攞出嚟解凍和出水,

好鬼方便o架!






材料:  急凍海參6條、排骨$50、紹酒、蒜蓉、蔥段和薑片

醃料: 豉油、老抽、糖、粟粉和麻油

調味: 蠔油、老抽、糖、粟粉和2碗水

做法: 用醃料醃排骨1小時;海參解凍後用薑片和蔥段出水10分鐘後切段;

燒熱鑊落油加蒜蓉和薑片起鑊,落排骨快炒後贊紹酒,

加2碗水先炆30分鐘;再加海參和調味繼續炆至海參腍,

最後加少少粟粉水埋獻汁便成。
 


 
大家可以入嚟Facebook讚下我新開嘅Fans專頁呀! 

2011年11月22日 星期二

露絲瑪莉烤雞!

焗雞時,

我鐘意由雞背開邊o架,

焗起嚟隻雞會靚D,

而且又易D熟,

如果可以食埋隻燒雞髀就very good啦!



2011年11月21日 星期一

朱家豬腳薑!

 
男人老狗都鐘意食豬腳薑???

係呀,

我家3個男人超鐘意食囉!

上次妹妹生完祈祈BB後,

我將食剩咗嘅豬腳薑攞咗番屋企,

加D甜醋、豬手和蛋落去繼續煲,

食到佢哋lam lam 脷呀!

9 個月後嘅今日,

朱家豬腳薑又出場啦!

甜醋都有幾隻唔同牌子,

八珍、同珍和鉅利,

母親大人用嘅係鉅利(佢話好好食喎),

我用嘅係同珍(經濟又實惠),

至於八珍就較為出名啦(個人覺得好甜呀),

由於唔係坐月食嘅薑醋,

所有煲薑嘅時間可縮短。



2011年11月20日 星期日

明星海鮮舫!

 


今日係父親大人的生忌,

我哋早上齊齊去拜祭他;

之後,

老公就番屋企等師傅整雪櫃,

而我哋就去咗沙田~明星海鮮舫食午餐,

呢度D嘢食都唔錯,

唔知係咪我哋太肚餓,

點咗好多點心,

仲叫咗D包包俾老公食添,

呢餐食咗差不多$600呀!

食完梗係要去妹妹家打麻雀啦!

承蒙各位祝福,

今次我又win 啦!

至於個雪櫃呢?

老公話原來係雪櫃個製冷timer壞咗,

所以停止咗製冷,

老公仲話師傅整咗唔夠5分鐘,

但老公就要等咗佢3個鐘囉!


例湯~木瓜眉豆花生雞腳豬尾骨湯!

襯今日係星期日,

都要煲番吓D湯水俾大小魔怪同老公飲吓,

唔係俾人哋扣家用就唔好啦!

呢個亦都係我家例湯之一,

大家飲唔飲呀???



2011年11月18日 星期五

簡易版~清湯牛白腩!


呢個牛肋條係前幾日買,

擺咗係冰箱幾日,

本來諗住星期日先整,

點知壞咗個雪櫃,

唯有要即時處置佢呀!


唔使諗咁多,

一於整呢個啦!

今次我整呢個係冇加油版,

但牛肋條一樣有油出o架!








 
 
 

材料: 牛肋條1.43磅、蘿蔔1個、鹽適量、蔥花

配料: 八角3粒、薑1大舊、紹酒1湯匙、冰糖一湯匙

做法: 牛肋條出水10分鐘後用水沖乾淨切件備用;蘿蔔滾刀切大件;

將4碗水(或水浸過牛肋條)和八角3粒、薑1大舊,

放入Le-creuset24cm湯煲內煮滾後,

加入牛肋條、紹酒1湯匙、冰糖一湯匙煮至翻滾後,

轉小火煲1小時15分鐘;先片去多餘油份後,

加蘿蔔煲多45分鐘,落鹽調味及灑上蔥花便成。

 

(如用普通煲煲牛腩要落多少少水和炆起碼2小時以上啦!)

(加上中國芹菜和芫茜會更香!)

 

 

 
大家可以入嚟Facebook讚下我新開嘅Fans專頁呀! 

2011年11月17日 星期四

超黑仔呀!

 

今日超黑仔呀!

我開雪櫃時都已經覺得唔凍,

再打開冰箱D凍肉溶哂添!

死火,

雪櫃壞咗;

即刻call維修,

點知啱啱過咗保養期10日,

(唔係黑成咁呀!)

唯有乖乖做番保養1年$360,

包維修費用和檢查,

零件我諗都包掛,

不過要星期六先嚟整呀!

咁雪櫃D嘢點算呀???
唯有急call搵人求救我D寶貝呀!

今晚超多餸,

將可以食嘅都煮哂佢嚟食呀!

咖哩豬皮魚蛋腸仔雞翼和雞翼尖、煎餃子、

蟹柳炒蛋、烚粟米和炒白菜,

全部大堆頭製作,

大小魔怪已經唔食飯剩係食餸,

最終都係食唔哂呀!



2011年11月16日 星期三

老師唔易做~外援餐!

 
做老師唔易o架!

咪睇我哋教幼稚園好似好易、好好玩,

其實好辛苦o架!

由朝做到晚,

冇時間休息外,

放咗工之後成日都要參加咩咩座談會,

又要參加咩咩工作坊,

家陣仲話要個個老師自我增值喎,

真係少D精力都唔可以應付到呀!

今日我要參加一個工作坊,

所以冇時間去準備餸菜,

唯有靠呢個外援餐啦!

2011年11月15日 星期二

菠蘿雞!

 
唔知點解,

我家3位男人好鐘意食酸酸甜甜嘅餸,

尤其是薑醋呀,

佢哋一見到就流哂口水呢!

可惜豬腳薑唔係話食就有得食,

唯有食住呢個餸頂吓癮先啦!

 
 

2011年11月14日 星期一

琵琶豆腐!

 
今年食咗2次大閘蟹啦!

係時候回歸平淡,

豆腐係一個唔錯嘅選擇嚟o架!

但係今次整呢個豆腐,

其實唔難,

不過要開油鑊,

唔係人人鐘意呀!


 

2011年11月13日 星期日

數字豬軟骨!

 
數字骨嘅做法個個都唔同,

但唔使理邊個係做法最正宗,

總之啱自己口味嘅就得啦!

今次我唔用金沙骨整,

我改咗用豬軟骨。

(原因係豬軟骨平D囉!)

 
 

8兩重大閘蟹!

 

今日係老公舊同學一年一度嘅大閘蟹宴,

大大話話我出席咗5年以上,

次次都係老公舊同學負責去相熟嘅老字號舖頭攞蟹,

今次攞到嘅蟹有8兩咁重,

超超超多膏,

仲好抵食添,

每隻$140咋!

連埋其他餸菜和酒樓代蒸蟹費用,

每人都係$405呀!

Round 1大閘蟹: 
 

2011年11月11日 星期五

誤打誤撞~自家製手抓餅配日式咖哩雞!


幾日整咗個中式嘅蔥油餅

攪到我呢幾日好想整點咖哩嘅薄餅添;

但自己又唔係咁識整,

所以用番整蔥油餅嘅方法,

加入自己少少嘅創意,

咁就誤打誤撞做咗呢個手抓餅啦!

唔知似唔似街買果D手抓餅呢???


 




材料: 中筋粉200g、熱水大半碗(約150g)、鹽半茶匙 、

白芝麻和牛油溶液

做法: 將中筋粉、鹽和熱水用筷子拌勻,然後用手搓粉糰至光滑,

將粉糰放入搽咗少少油嘅盆中,用濕毛巾蓋著等30分鐘;

白芝麻炒香備用;取出搽少少粉係枱面,

將粉糰搓成條狀,平均分成5份;用木棍將粉糰盡量壓平,

跟著反轉粉皮,搽牛油係粉皮面,平均灑上炒香芝麻,

將粉皮上下對摺,再搽牛油和灑上芝麻後再對摺,

反轉長條型粉皮慢慢卷起成圓形,用木棍將粉糰壓成薄餅;

燒熱易潔鑊落油放入薄餅煎至兩面金色,

用手將薄餅兩邊擠壓至鬆散便成。
 
 
 

 
大家可以入嚟Facebook讚下我新開嘅Fans專頁呀! 



2011年11月10日 星期四

柱候芋頭炆排骨!


今日天氣涼涼哋,

最啱食熱辣辣嘅煲仔菜o架啦!

正所謂不時不食,

呢排芋頭開始靚,

又買個返嚟食吓先得!

 

 

2011年11月9日 星期三

蔥油餅!

 

近排大小魔怪都好耐冇要求食宵夜;

唔知係咪噚晚食得多酸酸甜甜嘅菠蘿呢???

好似有D肚餓添,

呢個蔥油餅係做咗我哋噚晚嘅宵夜啦!

 
 
   
材料: 中筋粉200g、熱水大半碗(約150g)、蔥3條、

鹽1茶匙和油1湯匙 

做法: 將中筋粉和熱水用筷子拌勻,然後用手搓粉糰至光滑,

將粉糰放入搽咗少少油嘅盆中,用濕毛巾蓋著等30分鐘,

取出搽少少粉係枱面,用木棍將粉糰盡量壓平,

跟著反轉粉皮,搽油係粉皮面,平均灑上鹽和蔥粒,

(留一條邊唔使灑蔥粒),將有蔥粒的一邊慢慢卷起成長條型,

然後平均分成8份,將頭尾封口後,

將封口位放在掌心壓平,用木棍將粉糰壓成薄餅;

燒熱易潔鑊落油放入蔥油餅煎至兩面金色便成。
 
 


材料: 中筋粉200g、熱水大半碗(約150g)、蔥3條、

鹽1茶匙和油1湯匙 

做法: 將中筋粉和熱水用筷子拌勻,然後用手搓粉糰至光滑,

將粉糰放入搽咗少少油嘅盆中,用濕毛巾蓋著等30分鐘,

取出搽少少粉係枱面,用木棍將粉糰盡量壓平,

跟著反轉粉皮,搽油係粉皮面,平均灑上鹽和蔥粒,

(留一條邊唔使灑蔥粒),將有蔥粒的一邊慢慢卷起成長條型,

然後平均分成8份,將頭尾封口後,

將封口位放在掌心壓平,用木棍將粉糰壓成薄餅;

燒熱易潔鑊落油放入蔥油餅煎至兩面金色便成。

 
 

 
大家可以入嚟Facebook讚下我新開嘅Fans專頁呀!