2011年2月28日 星期一

街頭小食~咖哩魷魚什丸!

細細個同朋友仔出街,

尤其去親旺角,

我哋都好喜歡掃街。

由街頭掃到落街尾,

炸大腸、生腸雞腳、烤蕃薯、炒粟子、鮮榨蔗汁椰汁、

炒雞翼尖、串燒、炒麵、粉仔、碗仔翅和臭豆腐呀!

不過最鐘意食係咖哩魷魚魚蛋。

幣!

越講越想食添!

今日買唔到魷魚鬚,

搵日要整過呀!


2011年2月27日 星期日

炸雲吞!

上次整鵪鶉蛋燒賣時,
買錯咗廣東雲吞皮,
黃色兼有梘水味果隻呀!
好在我買咗5蚊咋。
見大小魔怪咁鐘意食炸嘢,
整俾佢哋食啦!
嘻嘻!其實我都鐘意食啊!


薑醋!

昨日我哋去咗探妹妹和BB姨甥囡呀!
出世第九日好可愛啊!
成朝係度瞓覺,
連我哋打麻雀都嘈唔醒佢呀!
不過唔知係咪BB知道我哋好多人嚟探佢,
所以到咗夜晚好扭計,
要人抱住先肯瞓。
妹妹話佢好百厭呀!
雖然未夠十二朝,
不過妹妹唔介意我哋嚟食和攞薑醋,
鐵蛋和豬手,
我鐘意食呀!

2011年2月25日 星期五

鵪鶉蛋燒賣!

呢款茶樓點心好耐冇食過啦!
雖然係就係冇咩益,
不過又唔係成日食,
一年都食唔到一次,
一於整嚟食啦!


2011年2月24日 星期四

咖哩薯仔洋蔥炆豬軟骨!


整親咖哩,
我通常會買現成咖哩o架!
好似利川、日式咖哩磚、新加坡A-1咖哩等等,
好少買咖哩粉自己整咖哩。
不過見屋企有樽冠益華記咖哩粉係度,
咪試吓用佢囉!

湊B,好辛苦啊!


星期一21/2,
姨甥女祈祈已經返咗屋企啦!

不過由於僱傭公司擺咗個大烏龍,

妹妹請嘅工人姐姐仍然係印尼!

依家由母親大人幫手睇住先。

第一日返到屋企,

個個大人都雞手鴨腳,

BB食奶唔記得烚奶樽;

BB沖涼又未搵整用品,

忙亂中毛巾跌咗落廁所度添!

真係好忙好忙呀!

不過,

最慘係祈祈將時間日晚顛倒,

早上瞓覺,

打籮打鼓幾嘈都唔醒;

到咗晚上11點後,

佢就眼仔碌碌,

成日扭人抱呢!

母親大人和妹妹妹夫好辛苦啊!

加油努力吧!
 


大家可以入嚟Facebook讚下我新開嘅Fans專頁呀!  

2011年2月23日 星期三

三色椒腰果炒雞丁!

過年前炸嘅腰果,
到依家仲有半樽,
我試過啦~仲脆o架!
今日終於可以清埋佢。




2011年2月20日 星期日

滷水牛展拼海蜇!

昨晚係個廚房櫃度剿到包滷水料,
仲係我舊年去潮州旅行時買o架!
唔用唔知會唔會壞呢???
今日去百佳買牛展和雞膇仔,
一於整滷味食呀!
加埋包即食海蜇拌碟,
咁就very good啦!






                                       
材料: 牛展2條、雞膇6隻、即食海蜇1包、薑和蔥
調味: 滷水料1包、豉油3湯匙、老抽3湯匙、紹酒1湯匙、冰糖3大粒
做法: 雞膇和牛展用薑蔥和紹酒出水;煮滾半煲水後,將調味放入煮滾,
由於奶奶唔食牛,所以先滷雞髀30分鐘後撈起;再滷牛展1個半小時,
待涼後切片上碟,拌埋即食海蜇,開飯啦!         




潮州滷水包



        即食海蜇(百佳買)

 


大家可以入嚟Facebook讚下我新開嘅Fans專頁呀!  

遲來的拜年!

 
今朝10點,
買完餸返到屋企,
即接到大伯娘電話話嚟拜年,
好客嘅弟婦~即係我,
梗係要留客人食飯啦!
好彩今朝買定好多餸咋,
唔係趕唔切準時12點45分開飯呀!
唔講咁多,
即刻去準備餸菜,
好忙碌啊!

   

2011年2月19日 星期六

2年!




唔經唔覺開blog兩年啦!
呢兩年裡面,
識到你和妳,
係我嘅福氣嚟o架!
寫blog初期,
寫的是自己和家人的事情,
又或者是旅遊日誌;
慢慢轉變咗啦!
寫咗好多我嘅煮食經驗。
雖然係獻醜之作,
不過我會繼續努力Keep住寫,
希望大家繼續支持我啦!
 


大家可以入嚟Facebook讚下我新開嘅Fans專頁呀!  

忌廉芝士蛋糕!

由於妹妹是開刀生BB,
所以當姨甥女出世後,
妹妹冇咩嘢食得,
昨日剩係食咗1日粥水,
今日全日都係食粥或通粉,
咁點得o架!
今日一早焗咗呢個忌廉芝士蛋糕俾佢食,
我第一次焗呢款蛋糕咋,
妹妹希望妳鐘意啦!


2011年2月18日 星期五

萃華酒家!

 
今晚去探完啱啱生完BB嘅妹妹後,
母親大人和我好開心,
佢話要去慶祝吓喎!
我哋2個就嚟咗呢間~沙田萃華酒家。
好豪氣咁一人食一隻燒乳鴿,
仲唔要斬開用手撕開嚟食呀!
呢餐2個人食咗$554.5。

祈祈,生日快樂!


好開心
好感動,
好興奮,
好想即刻去睇妳,
好想即刻去摸摸妳,
好想即刻去聽聽妳的喊聲。
羅允祈,
祈祈,
我的姨甥女,
今日啱啱出世呀! 

 


大家可以入嚟Facebook讚下我新開嘅Fans專頁呀!  

2011年2月17日 星期四

正月十五日元宵節~糖不甩!

今日是農曆正月十五日~元宵佳節!
為咗應節梗係要食湯圓。
湯圓我剩係鐘意食芝麻湯圓,
同埋佢~糖不甩啦!
吃過糖不甩,
願天下有情人打風都打唔甩呀!

2011年2月16日 星期三

南乳煎雞翼!

大小魔怪喜歡食雞係人都知,
無論煎、炸、蒸、炆和焗等等,
佢哋都唔會放過,
咁究竟有咩雞佢哋唔食o架呢???


2011年2月15日 星期二

大煲!

今日嘅天氣真係好鬼死凍,
凍到連腳趾都有僵嘅感覺,
攪到我不斷食嘢嚟保暖,
睇怕呢個冬天又要肥幾十磅啦!
今晚炆咗一大煲薯仔豬軟骨,
如果食唔哂嘅話留番聽日煮麵食都好喎!
不過最大問題係仲有冇得剩呢???

2011年2月14日 星期一

情人節晚餐!

係西方情人節嘅日子,
梗係要食西餐啦!
自知整西餐唔叻o架啦!
不過呢餐係講心嘅,
好唔好食都唔重要囉!
貪得意剪咗2個心心牛扒,
其餘邊邊就煎咗俾大小魔怪食。
除咗牛扒外,
還配了椒鹽豆角和芝士佳士拿腸,
仲有一碟香草白汁三色螺絲粉!


2011年2月13日 星期日

簡易版~梅菜扣肉!

今日天氣涼咗好多呀!
又落埋成日雨添,
聽日又要返工,
真係唔想"郁"呀!
為咗要消滅惠州梅菜,
今日整咗個簡易版~梅菜扣肉。
我懶冇炸豬皮呀!


2011年2月12日 星期六

寶貝!

年年過年例牌指定動作~炸腰果!
首先將腰果用鹽水出水後,
舖在抹手紙上吸乾水份約半天;
燒熱油鑊用小火慢慢炸,
千祈唔好心急,
我會用鑊鏟時不時攪攪佢,
等腰果平均受熱,
係呢個時候一定要有耐性等佢哋慢慢炸至金黃色,
一過火就會燶呀!
炸完後,
又要用抹手紙索油,
待涼後灑少許鹽入樽。
我會當寶咁收埋佢,
做餸時最後加腰果撈勻就食得,
好鬼方便呀!
不過一定唔可以俾大小魔怪知係邊,
如果唔係D腰果就會好快冇哂o架啦!

2011年2月11日 星期五

越來越好~斬雞技巧!

係新年裡面,
差不多日日都食雞,
唔想成日食手撕雞,
唯有自己學斬雞啦!
之前我斬雞連大小魔怪話好驚呀!
驚咩呀???
佢驚我大力斬雞D聲,
好殘忍兼驚我會斬親自己喎!
其實,我都好特驚o架!
不過唔知道係咪呢排斬雞斬得多,
連姐夫都讚我斬雞技巧好似好咗,
排番隻雞出嚟靚咗呀!
嘻嘻!咁以後我哋唔使成日食手撕雞啦!



18年!


18年!

足足成為朱太18年啦!
都知你係個冇咩情趣嘅人o架啦!
唔識送花或禮物,
又唔識氹人哋開心。
不過,
都多謝你呢18年嚟處處忍讓我,
當我發脾氣鬧人時,
你唔會點出聲,
又唔會俾反應,
所以有時我覺得你有冇聽我講嘢o架???
不過咁都好o架!
起碼大家唔會對罵,
傷感情嘛!
好彩臨尾係你都識補飛!

 

大家可以入嚟Facebook讚下我新開嘅Fans專頁呀! 



2011年2月10日 星期四

香港沙田凱悅酒店咖啡廳~自助晚餐!

 
今晚約咗lonely, 亞mei,sand sand和我,
去沙田凱悅酒店食自助餐,
其實呢間酒店係大學站附近,
一出大學火車站就會見到啦!
雖然食物選擇唔多,
但勝在環境都唔錯。

蒜香魚露豬扒配菜飯!

今朝唔想食太多嘢,
因為夜晚要去食自助餐,
留肚食好嘢。
簡簡單單,
一樣咁好味呀!


2011年2月9日 星期三

簡易版~海蜇燻蹄!

今日是大年初七~人日,
我雀后祝大家人日快樂!
襯呢幾日熱番少少,
整個冷盆嘆吓先得!

2011年2月8日 星期二

梅菜鴨!

係惠州攞咗3斤甜梅菜和5斤咸梅菜返嚟,
梗係要快快消滅佢啦!
俾咗2棵咸梅菜母親大人外,
至於其餘果D梅菜呢???
我要分俾有緣人先得!
當我一攞到D梅菜之後,
我第一樣諗起想整嘅就係呢個梅菜鴨!


2011年2月7日 星期一

探親之旅~惠州!

 
今次返惠州,
我們一行六人~大伯、姑奶和她的女兒、老公、小魔怪和我,
大魔怪留守屋企等客人來。(其實仍想打機就真!)
我哋好耐冇返惠州,
起碼有6-7年;
記得初初上惠州,
只有近西湖邊的樓高少少之外,
其餘我都是平房咋!
真係冇咩高樓大廈,
出到郊區,
D路都係泥路。
不過依家完全唔同哂啦!
成個小深圳一樣,
道路設備完善,
仲有個超現代化嘅體育場添!

2011年2月6日 星期日

探親之旅~惠州手信篇!

 
來去匆匆。
昨日下午3點到惠州,
今日下午五時已經回來香港,
目的是探望老公患病的叔父。
今次是我們第一次過年返惠州,
得到老公的弟弟和弟婦熱情款待,
我們真是滿載而歸啊!

2011年2月4日 星期五

大年初二~開年飯!


chinese11.jpg



今日是大年初二,
中國傳統習俗要食開年飯,
餸菜好簡單,
不過每個餸菜,
我都起咗個好有意頭名俾佢哋呀!
食過開年飯後,
又係時候出外拜年啦喂!


2011年2月3日 星期四

大年初一~食齋日!

 
今日係大年初一,
朱家傳統是食齋日。
今年煮嘅齋菜和上年差不多,
不過一樣咁好味呀!
食完早飯後,
係時候出外拜年啦!

2011年2月2日 星期三

團年飯!

 
我開始放假啦!
由今日起放到2月14日情人節先返學,
超爽呀!
今晚係朱家食團年飯嘅大日子,
母親大人和妹妹妹夫都嚟我屋企齊齊團年,
所以一早起身準備買餸呀!

新年快樂!




 今日係年三十晚,

我雀后祝大家:

心想事成!
身體健康!
萬事如意!
步步高升!
笑口常開!
財源滾滾!
新年快樂!
而我嘅新年願意係~繼續雀壇無敵手呀!
 

大家可以入嚟Facebook讚下我新開嘅Fans專頁呀! 

2011年2月1日 星期二

我很醜,但我很好味~炸蛋散!

 
今日學校舉行新春慶祝會,
每位老師都會分工合作,
構思不同的賀年遊戲和活動,
讓家長和小朋友能有個愉快的早上。
今年我又係負責有關食的攤位~糖不甩和炸蛋散!
今次搓呢個蛋散粉糰個個家長都讚好味道,
唔太甜,
我好滿意啊!