2010年3月31日 星期三

美極炸雞!

 
今日我整呢個炸雞都好鬼趕呀!
 
成5點幾先開始醃雞翼,
 
醃咗45分鐘就攞去炸,
 
炸完我都唔敢即刻食,
 
等咗一陣先食,
 
雖然係就係熱氣咗少少,
 
嘻嘻!又真係好味道喎!
 
送酒一流o架!
 

2010年3月30日 星期二

鵝肝醬搽麵包!

 
 
舊年我同老公去法國時買咗呢罐鵝肝醬,
本來諗住大小魔怪生日時開嚟招呼親朋戚友,
不過最後都冇食到;
今日佢終於做咗我哋嘅宵夜啦!
幣!唔覺唔覺,我食咗4件添!

2010年3月28日 星期日

木瓜眉豆花生紅棗雞腳排骨湯!

 
我好耐冇正正經經煲老火湯啦!
次次都係滾湯,
又或者是罐頭湯呢!
襯今日有少少時間,
一朝早點落街買整材料煲湯!

2010年3月27日 星期六

大鄉里出城~上環生記!

 
今日我同母親大人分別自己坐巴士去維園睇花展,
我以為得我一個大鄉里唔識路,
原本母親大人同我一樣,
都係唔認路o架!
而且聽嘢仲一舊舊添!
姐夫介紹我們到上環畢街~生記食粥,
母親大人竟然聽錯係西環北街,
攪到我哋梗係去錯地方啦!
又要搭的士落上環呀!

一到上環,
我哋呢兩個大鄉里邊會搵唔到生記,
咪狂打電話俾係公司做梗野嘅姐夫求救問路囉!
哈哈!姐夫接我哋嘅電話都覺得煩到手軟呀!
我叫埋姐夫過嚟一齊食嘢,
最多我請啦!
(嘻嘻!姐夫當然答應啦!不過事後有點後悔,
因為係人都知母親大人講嘢大大聲,好失禮呀!)

原來生記都有3間,
一間食粥、一間食麵和一間食米線;
我哋唔知邊間係老舖,
所以去咗食麵果間呀!
去到好多人要排隊,
不過唔鐘意生記D伙記寸寸哋話要人齊先入得去喎!
我同母親大人唔理姐夫坐低食先!

2010年3月26日 星期五

無理的投訴!

 
近呢排每逢食晚飯時,
 
大小魔怪都會投訴,
 
話D餸好睇唔好食,
 
好食嘅又唔夠食;
 
喂,亞囝想死係咪呀!
 
人嘅容忍度有限,
 
亞虎已經激到我死死吓,
 
(前幾日回覆回應同出唔到post,
 
今日又壞瀏灠人數,真係唔知道明天又壞咩嘢啦!)
 
你兩個依家又激我,
 
激到我擺工以後唔再煮餸,
 
等工人姐姐日日煮D冇味嘢俾你哋食,
 
咁你哋就知道我煮嘅嘢幾咁好食啦!
 
好喎!我真係要認真諗諗呢個方法整整佢哋先得!

 

2010年3月19日 星期五

蒜蓉香草焗雞!

 
大小魔怪係雞狂,
 
冇雞不歡,與雞有仇;
 
昨日,佢哋正日生日已經問我點解冇雞食。
 
見佢哋咁鐘意食雞,
 
今日焗隻雞俾佢哋食啦!
 

2010年3月18日 星期四

第一次曲奇粉整曲奇!

 
星期日買咗包曲奇粉返屋企,
等到昨晚先有時間整。
嘩!要用227g牛油搓粉喎!
咁咪好油囉!
我唔想落太多牛油,
於是加咗少少牛油和一隻雞蛋,
夠搓成糰便算,
用180度焗20分鐘,
每盆只係焗得9個咋!
總共整咗4盆,
共39個呀!
睇吓食唔食得先!

2010年3月14日 星期日

大小魔怪15歲生日啦!

 
3月18日是大小魔怪正日生日,
同時老公亦係3月30日生日,
咁今日就一次過為三囝爺一齊做生日啦!
其實我想整好多嘢o架!
不過得一對手,
工人姐姐剩係幫手切切切,洗洗洗!
我唯有犧牲少少唔打麻雀,
密密整啦!

生日會嘅有食物:

2010年3月13日 星期六

泰式鳳爪!

 
雖然3月18日先至係大小魔怪的生日,
 
不過老人家話做生日一定做早唔做遲,
 
又要就埋大家唔使返工,
 
所以決定明天3月14日為大小魔怪做生日啦!
 
放工之後,
 
同老公一齊落元朗買餸,
 
為明天的生日會準備食物。
 
為妳哋準備了一個冷凍小食~泰式鳳爪!
 
雪凍明天食!
 
 

2010年3月12日 星期五

白汁芝士焗雞、砂鍋獅子頭!

 
今日我整呢個兩餸,
 
基本上啱哂我一家人嘅口味。
 
雞、薯仔、洋蔥、白汁加芝士碎,
 
仲要係焗到金黃色,
 
未煮諗起都想食呀!
 
炸香嘅獅子頭,
 
加埋雞湯和娃娃菜一齊煮,
 
嘩!好清甜啊!
 

2010年3月11日 星期四

考驗!

 
今日又是考驗新工人姐姐廚藝的大日子,
昨晚我已經買定哂雞翼和節瓜,
仲逐一講明豉油雞翼是用現成豉油汁加2碗水煮20分鐘;
節瓜就煮粉絲蝦米啦!
睇睇佢煮成點!

2010年3月9日 星期二

粟米魚肚羹!

 
昨日我咳咗一整日,
 
成個人都好疲倦,
 
九點半已經上床瞓覺,
 
點知一瞓仲咳,
 
咳咳咳,咳到唔停啊!
 
瞓到朦朧之際,
 
老公突然叫醒我,
 
因為佢沖咗杯蜜糖水俾我飲,
 
嘩!好sweet呀!
 
跟著我一覺瞓到天光啦!
 

 

2010年3月8日 星期一

糖醋小排骨!

 
今日天氣又開始轉涼了,
 
而且整天都下著毛毛雨,
 
唔夠瞓嘅我好疲倦啊!
 
就連食嘢都好似冇胃口呀!
 
見好耐都冇食過酸酸甜甜野,
 
嘻嘻!襯今日係三八婦女節,
 
整番樣自己鐘意食嘅餸先得!

 

2010年3月6日 星期六

八點九嘅宵夜!

 
八點九食宵夜???
係呀!
由於奶奶飲食習慣與我們不同,
每逢星期六日,
早午晚餐都要好早食o架!
我哋通常早上11點就食午餐,
6點左右就會食晚餐。
到咗8點零9點,
大小魔怪唔肚餓就奇啦!
我係雪櫃攞埋半包白菜豬肉煎餃出嚟,
做咗我哋今晚嘅宵夜啦! 

健康午餐!

 
呢排天氣好差,
 
又濕又熱,
 
對怕熱和有鼻敏感的我,
 
超辛苦呀!
 
唔想食飯,
 
唯有改食粥,
 
食粥梗係要炒粉啦!
 
今日唔只有炒粉,
 
 
仲有我拿手嘅炒粒粒!


 炒粒粒

2010年3月2日 星期二

香煎鮫魚!

 
呢幾日大魔怪又開始作病,
 
咳、流鼻水,
 
間中仲話好熱添!
 
唔通小魔怪D感冒傳染咗俾佢。
 
聽Blog友話感冒唔好食雞,
 
所以今日都係唔好食雞啦!
 
改食魚。
 
(不過之前我餐餐都食雞喎!)